Bawipa Zanriah Aa Thawk Ning
Judah miphun nih kumkhat ah voikhat an hman tawn mi an puai biapi tuk asi mi lanhtak puai zan ah Jesuh le a a zultu pawl cu hmunkhat te ah zanriah an rak dum tti hna hihi Jesuh a donghnak zanriah ei a si. Cu zan theng te ah cun Bawipa zanriah kan ti mi cu Jesuh nih ka mah ka rat hlan lo nan rak hman peng lai tiah nawl a rak pek hna. Hi kaa zawn ah Jesuh nih a chim mi bia tete hi duhsah tein rak rel law a tang lei ah kan rak ceih hna lai. (Rawl an ei lio ah Jesuh nih changreu aa lak i thluachuah a pek hnu ah a cheu i a zultu kha a pek hna, “La ulaw ei uh hi hi ka pum asi,” cun hrai kha a lak i Pathian sin ah lomhnak bia a chim dih hnu ah, “nan dih lak in ding uh zeicatiah hi ka thi hi biakamnak fehtertu ka thi a si mitampi sual ngeih thiamnak caah ka thlet mi a si”. tiah a ti. Mtt26:26-28).
Cu cu ni hin ni tiang Bawipa philh lonak ah kan hman peng mi Bawipa zanriah aa thoknak hrampi cu a si. Bible chan Khrihfabu nih hman hram an rak thok i a tu kan chan tiang Khrihfabu poh ah hman a si. Asinain kan ei mi changreu le kan din mi misur hang chung ah Jesuh zei tin pungsan in dah aa tel ti hi Khrihfabu lak ah a dong kho lo mi bia alnak ah aa hun i cang. Hi kong he pehtlai in ruahnak le pomning phun 3 in aa tthen.
1) Kan ei mi changreu le kan din mi misur hang hna hi Pastor nih thla an vun camh bak in Jesuh thi le sa taktak ah aa thleng tiah an zumh. Mah hi Roman catholic Khrihfabu nih bia tak tein an dirpi mi asi. Hi bantuk cawnpiaknak ruang ah hin hlan lio zumtu cu mi sa ei le minung thiding tiah sual an rak phawt phah hna.
2) Changreu le misur hang kan hman mi hna hi Jesuh Thi le sa taktak ah cun aa thleng lo nain, Jesuh cu a thlarau in maw a silo ah zei ti maw in cun aa tel hrimhrim ko tiah an zumh. hi hi Martin Luther nih a rak aupi mi a si i ni hin tiang zong ah Lutheran Khrihfabu nih cun an pom peng rih.
3) A dang pakhat nih cun changreu le misur hang kan hman mi hi Jesuh thi le sa taktak zong ah aa thleng lo i, a thlarau zong in special hlei i hmunhma a laknak a um hrimhrim lo, Jesuh cu a mah a zumtu hna sin ah a um ko cu ta, Bawipa zanriah cu kan caah Jesuh a thihnak philh lonak caah kan hman mi sawhsawh a si ko tiah an ti ve. (baptist tam deuh poming asi).
A cunglei ah Vawlei cung khrihfabu nih Bawipa zanriah an pomning kan rak langhter dih cang, hi phun 3 chung ah hin Khrihfa a si mi poh kan i tel dih. Bawipa zanriah na pomning nih zei bantuk khrihfabu um ding dah na si ti kha fiang ngai in a langhter lai. Maathai 26 chung kan rel tik ah Jesuh nih kei mah philh lonak ah nan rak hman lai tiah a zultu a ti ko hna, cu cu a fiang ngai ko rua tiah ka ruah. Cun Jesuh nih “hihi ka sa asi, hi hi ka thi a si”. a ti tik ah kan philh lo ding a biapi tuk mi cu Jesuh nih thawngtha cauk dangdang zong ah mah bantuk he aa lo mi bia a chim pah tawn, tahchunnak ah “kei mah cu lam le biatak le nunnak ka si”. “kei mah cu inkaa ka si” ti bantuk (keimah ti le Hi hi ti biafang) hi tahchunhnak bantuk in a hman tawn mi bia a si. Cucaah hi hi ka sa a si a ti tik ah literal tein Bawipa sa ei le Bawpa thi din bantuk taktak i kan ruah ah cun a palh deuh man lai tiah ka hmuh. Bawipa zanriah cu zumtu caah a biapi tuk hringhren mi asi bantuk in Kan hmaan pah i kan lungput zong a biapi tuk ve mi a si. Comment ah kan poming le kan hmuh ning kan i ceih hna lai…
Discover more from Bible Chung Ah Thuh Mi Biathli
Subscribe to get the latest posts sent to your email.
