OT Ah Israel Miphun Nih Cheuhra An Rak Peknak A Ruang Pathum

Pathian nih Israel miphun cheuhra cheukhat pek a rak fial hna nak a ruang pathum a um. Phundang in kan chim ahcun cheuhra phunthum in an rak pek (They gave three types of tithes). Cu a ruang pathum hna cu a tanglei ah pakhat hnu pakhat in kan rak zoh hna lai.

1. Levi Miphun Hna Caah An Rak pek (Levitical Tithes)

Israel miphun kha Canaan ram chungah luh ding an si cang tikah an miphun chungah ram thencheunak kha an rak tuah. Miphun 12 chungah phun 11 lawng kha Canaan ram chungah vawlei ro an rak pek hna i miphun 1 a simi Levi miphun tu cu vawlei ro pek an rak si lo i Pathian biakinn chung i riantuantu dingah amah Pathian hrimhrim nih a rak i chiah hna (Deu 18:1-8). Kha lio chan ah Levi miphun cu pa lawng in minung 22,000 an rak si i nu he in cun 40,000 leng an rak si lai tiah zumh a si. Israel miphun Cannan ram chung a lutmi hi pa lawng minung 600,000 an rak si i nu le hngakchia he cun 1 million hrawng an rak si lai tiah zumh a si. Israel miphun phun 11 hna nih khan levites miphun dihlak kha an rak cawm hna a herh. An cawm khawh hna nak hnga ding caah cun Israel miphun chung i family dihlak nih cehuhra cheukhat an rak pek cio a herhnak kha a si. Deu 12:19 le 14:27 ahcun Pathian nih anmah khua cio ah a ummi Levites mi hna daihthlenh lo ding kha a rak fialmi hna kan hmuh. Cu cheuhra an pekmi cu a min ah Levitical tithes tiah auh a si.

Cheuhra cheukhat peknak a voikhatnak bik nawlbia ah ser a hun si cu Lev 27:30-34 ah hin a si, cucu Israel miphun ramcar an chuah a kum 2nk ah khan a si. Number 18:21 ahcun Pathian nih “Cheuhra cheukhat vialte cu ka Biakin an rianh ruangah Levites miphun hna sinah ka pek cang hna” tiah Moses sinah a rak chim. Lev 18:26 ahcun Levi mi hna zong nih khan cheuhra chungin cheukhat kha Pathian sinah an pek ve lai nak kong kha a chim fawn. Cucu zeiruang ah dah a si ti ahcun levites miphun hna caah israel nih an rak pek bantukin levite hna zong nih Temple zohkhenhnak caah an rak pek ve kha a herhmi a si. Cucu cheuhra cheukhat pek ding phun 3 lakah phunkhat a si i Israel le Levites caah an rak pek tinak kha a si.

2. Biaknak Puai Sunglawi Caah An Rak Pek (Religious Festivals)

Israel miphun nih cheuhra an rak pekmi a phun hnihnak cu biaknak puai tuahnak (religious festivals) caah kumkhat chungah an hmuhmi chungin Pathian caah an rak thleidan fawn. Cucu Deuteronomy 14:22-26 chungah hmuh khawh a si. A pahnihnak tithe hi cu zeidang caah siloin an mah le chungkhar cio nih Pathian hmai ah va eidinnak caah khan a si. Midang sinah pek asi lo. Zeizat sat tiin a ri khiah a um lo. (4 times in sabbatical year)

3. Mi Fifak Mi Harsa Caah Peknak (The Poor Tithes)

Cheuhra a phunthumnak cu Deu 14:28-29 ah hmuh khawh a si i “the poor tithes” ti zongah ti a si. Cucu kum 3 ah voikhat in Israel miphun vialte nih sifak le harsa, nuhmei le ngaktah hna caah an rak pekmi asi.

Cu phunthum cu Israel miphun dihlak nih Pathian hmai ah an rak pekmi cheuhra (tithe) an rak rak si. A Hnu ah Biakam thar chan ah cheuhra kan pek a herh ti maw? Timi tlangtar in ka rak peh than te lai.

Crd# Tha Ceu Lian (M. Th)