(Efesa 5:18-21)Thiang Thlarau Khah Cu Zeidah Asi?

18nak.”Misur zu ri hlah uh” Paul nih Thiang

 Thlarau khah cu zurit he a tahchunh caah mitampi cu Thiangthlarau khah ah cun zuri bantuk in um a si rua tiah an ruah sual tawn, cu ruang ah cun Thiang Thlarau kan ri an ti i pumhnak ah ning cang lo in an i let an i thal tawnnak khi a si an mah nih cun baibal ning in kan cawlcang tiah an ti ve ko man lai. Asinain Paul nih Thiang Thlarau khah cu Zurit he an i lawh caah a tahchunh mi si lo in Zurit hi Efesa khua ah a rak lar taktak mi a si ruang tu ah asi deuh.

“Zuri hlah uh” a ti mi biafang hnu lei ah a um mi Efesa khua background a tawinak te in kan rak zoh hmanh lai. Efesa khua hi Khrihfa an rak si lo nain biaknak lei ah aa rak zuam tuk mi an si, an pathian min ah Zeus ti asi, cu Zeus nih cun fapa a hrin i a min ah Dionisus ti asi, cu Dionisus cu “the god of wine” ti zong ah rak ouh a si. Cu Pathian an biak poh ah cun nu he pa he zu an ding hna i an rit a cei deuhdeuh pohah pathian he kan i neih deuh tiah an rak ruah. asi lo ah thlarau in kan khat deuh tiah an rak zumh ning asi. An rit tuk cang hnu ah cun nu le pa zong an it tti hna an sual hna i ning cang lo taktak in khua an rak sa hna tiah Greek History ah fiang tein a lang. Cucaah an nih ca ah cun zurit hi nuamhnak sawhsawh ca si lo in an pathian biaknak ah an rak hman mi asi.  Hi backgound he na zoh cih ah cun a fiang tuk mi cu Paul nih zuri hlah uh a tinak a ruang cu Efesa khua i a um ve mi zum lo tu nih an pathian biaknak ah an hman mi zurit hi a tha lo thil tha lo lei ah an hruaitu hna a si hih an tuahsernak nih lung tuai in an chia hna hlah seh, Khrihfa nan si cang hnu ah cun zurit si lo in Thiang Thlarau tu in nan khah deuh awk a si ti khi paul nih a chim duhnak cu asi.

A siahcun Thlarau khah cu zeidah a si kun, (thlarau rit a si maw?)  Thlarau in kan khah ah cun zei tin dah kan um lai i zei tin dah kan i theih khawh kun lai ti hi biahalnak a chuak mi cu si. Thlarau khah ah cun hoolh theih lo in holh luaimai a si rua ti a ruat mi zong kan um kho man, cun Thlarau khah ah cun phundang pi khin i thlen a si rua tiah a ruat mi an tampi. Cun holhtheih lo in a holh i van hla sak pah in zapi pumhnak ah lam pah in Pathiang a thangthat mi pawl khi Thlarau in a khat tuk mi ah kan ruah tawn hna. Asinain mah bantuk pawl hi Baibal nih Thlarau khah le khah lo tahnak ah a hman mi an rak si lo, a tang lei A hme 19nak in 21nak tiang na rel ah cun pawl nih Thlarau khah nih a chuahpi mi theipar pakhat hnu pakhat in a hun fianter hna, ca kan rel pah in kan mah le kan mah raj j tah ve chun hna hmanh usih.

 

19nak, Pakhatnak ah Thlarau khah nun cu Thinlung chung dihlak in Pathian tthatthat duhnak ngeih hi a si e a ti. Tthangthat nun ngeih hi thlarau khah nih a chuahpi mi theipar pakhat a rak si ve. Cucu baibal hmun tampi ah a lang Pathian hrimhrim nih ka keimah lungput a kengtu a ti mi David zong hi Thangthatnak hla a sa zunzal.

20nak ah “Zei zong te cung ah u lom zungzal uh” Paul nih a cakuat dang zong ah i lom zungzal uh ti hi a ttial lengmang mi asi, Filipi cakuat lawnglanwg hmanh ah voi 16 hranwg a hman…

• Philippians 1:4, 18, 25 
• Philippians 2:2, 9, 17, 18, 28, 29 
• Philippians 3:1 (Bawipa ah i lom ko uh) 
• Philippians 4:1, 4, 6, 10 ) 
• 1 Thesalon 5: 16-17 ( Bawipa ah i lom zungzal ko uh).

Paul nih zumtu sin ah Bawipa ah i lom zungzal uh a ti lio khuacaan hi zumtu an derthawm lio an ngaihchiat lio, harnak le hremnak an ton tawn lio ah khin a si bik tawn. Cubantuk in Efesa khua zong hi khrihfa si ruang ah hremnak, namneh thlanglamhnak a rak tong len mi ve mi an si, cu lio theng te ah cun Paul nih ulawm ko uh a ti hna, zumtu kan i lomhnak hi lenglang vawlei thli ri le, pawngkam boruak nih a chuah pi mi a si hrimhrim lo, kan chung um mi Thiang thlarau nih ngaihchiat a kan sian lo ruang ah a rak si deuh. Cu lomhnak cu zapi nih kan ngeih khawh mi a si lo i Thiang Thlarau khah nun nih a chuahpi mi theipar asi.

21nak “tang ah i dor uh”  Tlangcung cawnpiaknak khi na rel ah cun Jesuh nih a kaa a pau bak in a voikhatnak biafang a chuak mi cu Tangdor nun ngeih hi a si(Mat 5:3 thlarau in a si a fak mi hna cu mi lunglom an si). Thlarau sifah cu nunttumh i tangdor te um khi a si. Paul cakuat chung zong ah voitam pi a ttial cu lak ah zapi nih kan theih mi cu Filipi 2:8 hi a si, a mah Jesuh hrimhrim hi tangdor tein a um i Pa Pathian nawl a ngai tiah a ti. Efesa khua khrihfabu hi zum lotu lak ah zumtu barawh zet te a dir mi an rak si caah nih sawhnak an tong, cun a cheu cu an paw cawmnak rian an ttuan cuahmah mi tiang in an rak chuah hna, har nak a phunphun an rak tong a si nain Paul nih i tangdor ko uh tiah thazang a rak pek hna. Namneh mi si lio ah tangdor te um hi a har taktak mi a si Thlarau in a khat mi zumtu lanwg nih an ngeih khawh mi nun a rak si hrimhrim ko.

Thlarau khah cu Thlarau rit a si lo cun, Thlarau khah cu Pumhnak biakinn ah i leh le i thal i kui le lam luaimai zong khi aa tal hrimhrim lo, thlarau khah nih a chuah pi mi theipar cu chung nun i thlen hi a si, zapi hmai i lenglang in thil kan tuah mi hna hi Thiang Thlarau khah le khah lo tahnak fung ah kan hman awk a si lo, Thiang thlarau khah nih a chuah pi mi cu chung nun i thlennak tu hi a rak si deuh. Careltu dihlak Pathian nih thlachuah in pee hna seh

Author: Zung Awi Thawng