Ngaihthiam Khawh Lo Mi Sualnak Hi Zumtu Nih Tuah Khawh Asi Maw?

Mathai 12:31-32, 31Cucaah kan chimh hna, an sualnak vialte le Pathian an thangchiatnak vialte hna cu ngaihthiam an si dih ko lai. Sihmanhsehlaw aho hmanh Thlarau a thangchiatmi cu ngaithiam an si lai lo.32Cun aho hmanh nih Mi Fapa ralchan in bia a chim ahcun, ngaihthiam a si ko lai. Sihmanhsehlaw aho hmanh Thlarau Thiang ralchan in bia a chimmi cu a tuchan ah siseh, a ra lai mi chan ah siseh, ngaihthiam a si hrimhrim lai lo.

Zumtu tampi nih Thiang Thlarau ralchanh i bia thalo chim cu zei khi dah a si hnga? Tiah lungtuai in kan mah le kan mah zong bia halnak kan i tuah i Baibal cawnpiaktu kan saya te sin zong ah kan hal tawn hna. A caan ah cun lungrethei nawn in kei hi Pathian nih a ngaithiam khawh lomi sualnak hna ka tuah mi a um sual hnga maw? Tiah bia kan i hal caan a um cio men lai tiah ka ruah. Pathian nih a ngaihthiam khawh lo mi sualnak cu zeidah a si i, cun Thiang Thlarau ralchanh biachim cu zeidah a si timi Jesuh chimmi chirchan in kan rak zoh hna hmanh lai.

Zei ruang ah dah hibia hi Jesuh nih a rak chim ti kan fian khawhnak hnga an bia hram in kan rak zoh hna lai. Matthai 12:22 in kan rel ah cun Khuachia nih a tuah ruang ah a mit zong khua a hmu lo i a holh zong a holh kho lo mipa khaJesuh nih a damternak kan hmuh. V24, A damter mi cu Pharasee pawl nih an theih tik ah Jesuh cu khuachia bawi Belzabul a si Khuachia tthawnnak in pei a dam ter ko cu tiah an rak ti. Cu bantuk ruahnak an ngeih cu Jesuh nih a hmuh tik ah “a hohmanh Thiang Thlarau ralchanh in bia a chim mi cu ngaihthiam khawh an si lai lo” tiah a chimnak cu a si. A context nih fiang tein a langhter mi cu Jesuh nih mahbia hi a zultu hna sin ah a chim mi asi lo, cun mi zapi sin cawnpiaknak zong ah a chim mi a si fawn lo, Thiang Thlarau tthawnnak an mit in a hmu i an hna in an theih ko bu ah lungkhon in a cohlang duh lo mi Pharasee pawl sin ah a chim mi asi ti kha hmaisa ah theih a biapi tuk hringhren.

Pathian nih ngaihthiam khawh lo mi sualnak kan ti mi hi minung nih a luancia caan ah kan rak tuah mi sualnak sawhsawh men khi si lo in, a hramthok tein Thiang Thlarau riantuannak zei ah a rel lo i zeitik hmanh ah lungtthumh le sual ngaichih in Pathian panh zong i timh hrimhrim lo khi asi. Cucu zumtu nih tuah khawh mi sualnak a si lo, ka tuah sual cang rua ti na ruah ah cun na tuah lo tinak a langhtertu a si lehlam. Zeicahtiah a zum lo mi nih cun Pathian sin ah ka sual tuk cang rua ti bantuk phuhrunnak kha a pel te hmanh an ngei kho lo. Cucaah Ngaihthiam khawh lo mi sualnak cu “Pathian vel le Thlarau riantuannak fiang tein theih ko bu i Zumh duh lo” khi asi.