Baibal hlethlaitu nih Biakam Hlun ah YAWEH or (Jehovah) min hi voi 7000 hrawng a um tiah an ti. Asinain Khuaruahhar taktak a si mi cu Biakamthar cauk khawmhsuatnak an rak tuah lio ah hin Jesuh thih hnu in Aposle ttialmi an si rua tiah rak ruah mi cauk 5000 reng lo an rak chuahpi, cu cauk chung vialte ah cun YAWEH (Jehovah) min pakhat hmanh hmuh awk a rak um ti lo. Biakam Hlun chan i an rak hman mi min YAWEH kha Biakamthar ah cun an tlau dih i YAWEH aiawh ah Jesuh min tu hun hman a hung si. Cheukhat concordance nih a langhter ning ahcun Biakamthar ah hin Jesuh min 900 hrawng a lang ti si. Zultu pawl nih Jesuh min hmang in Khauruahhar phunphun an rak tuah, kee zeng mi zong Jesuh min in an dam ter hna. Biakamhlun ah Jehovah (YAWEH) lanwglanwg Pathian asi an rak ti mi kha Biakamthar ah cun Jesuh lawnglanwg hi Pathian a si an ti, Jesuh min hi Biakamhlun lio i Jehovah (YAWEH) an rak hman bantuk in hman a si.
Asiah cun Biakamhlun Jehovah le Biakamthar Jesuh hi aa khat mi maw an si? A si lo ah Pathian dangdang dah an si? Oneness nih an zumh bantuk in Jesuh cu pa Pathian a si ti kha kan chim duhnak a si lo. Jesuh hi YAWEH asi ti kha biakamthar nih a langhter mi cu asi (one person ti si lo). Kan fiannak ding in chim ah cun Jesuh hi “second person of YAWEH” ti khawh asi. Zeitindah kan theih khawh ti cu a tang lei ah kan rak zoh hna hmanh lai.
Biakamhlun ah Jehovah (YAWEH) kong rak chim mi cacang kha biakamthar ah Jesuh kong chimnak ah an hun hman.
Palms 68:18 18Tlang sang par ah cun a hung kai i sal tlaihmi tampi aa hruaih hna; amah a dohtu hna nih khan amah cu laksawng an pek. Cuka ah cun Bawipa Pathian (Jehovah) cu a um lai.
Hi kaa Paslm hi Paulnih Efesa4:7-10 ah Jesuh kong chimnak ah a hun char than ⁸Cunglei i a hung kai tikah, Tlaihmi saltang hna kha a hruai hna i,Mi kha laksawng a pek hna,” tiah a ti. ⁹Cathiang nih, “A kai,” a ti tikah, zei dah a chim duhmi cu a si? A chim duhmi cu vawlei tang ah a lut hmasa tinak a si. ¹⁰Tanglei ah a vung ṭummi cu cunglei van vialte nakin a san deuhnak hmun ah a hung kaimi kha a si. Cucu zeizong vialte kha amah in a khahter dih nakhnga ca ah a si.
Cun Salms ah 102:25-27 ah Jahovah kong rak chim mi cu Hebrew 1:10-12 ah Jesuh kong chimnak ah a hun hman tthan “¹⁰Cun, “Bawipa, nangmah nih a hramthawk ah, Vawlei cu a hram na rak dirh, Cun van hna hi na kut in tuahmi an si.¹¹ Annih cu an rawk te ko lai nain, nang cu na hmun; Cun annih cu thilpuan bantuk in an hlun te ko lai;
¹² Angki bantuk in na bil dih te ko hna lai,Cun annih cu an i thleng lai. Sihmanhsehlaw nang cu na hmun, Cun na kum hna zong an dong bal lo,” tiah a ti. Jesuh cu Jahovah asinak lanwg si lo in zeizong vialte sertu arak sinak kha Hebrew nih a hun langhter than. Judah mi caah cun sertu hi Jehovah lawnglanwg a si tiah an rak zumh.
Isaih 40:3-5 Aw pakhat nih, “Bawipa (Jehovah) caah ramcar chungah lam pakhat sial u! Kan Pathian caah thetse ram i lam cu sial u. Horkuang vialte cu chilh an si lai itlang vialte cu chimh an si lai.Tlang cu hmun rawn ah an cang lai i a bingbomi hmun cu rawn didiai in an um lai. Cun Bawipa sunparnak cu a lang lai i mi vialte nih an hmuh lai. Hi biakamnak cu Bawipa hrimhrim nih a tuahmi a si,” a ti. Hi cacang i lak in Thawngtha 3, Mathai 3:1-3, Mark 1:1-4, Luka 3:2-6 ah John the baptist nih kha biakam hlun Jehovah (YAWEH) kha nihin Jesuh hi asi tiah fiang tein a langhter than.
Aposle nih an rak ttial mi biakamthar hmun tampi ah Jesuh cu biakamhlun YAWEH asinak kha an langhter cucu al awk tha lo in Biakamthar hmun tampi ah hmuh khawh an si. Adonghnak ah pakhat te in kan rak zoh rih hmanh lai.
Isaih 45:22-24”Vawleicung mi vialte hna,keimah leiah khan i mer u lawkhamhnak hmu u. Keimah lawnglawng hi Pathian cu ka si ko. Ka chimmi cu a hmaanmi a si i aa thleng lai lo. Keimah nih ka min chalh tein hi biakamnak hi ka tuah: 23, Mi vialte kha ka sinah an ra lai i ka hmaiah an kun lai; na sinah zumhawktlak tein kan um lai tiin bia an i kam lai,’ ka ti. Paul nih Filipi 2:9 -11 ah mah cacang te hi a hun nolh than i Jesuh kong chimnak ah a hun hman than “10 Cucaah Jesuh min upat in van ah a um mi le vawlei cung le vawlei tang a um mi vialte nih an khuk an i bil lai i, 11 Pa Pathian sunparnak ca ah Jesuh Khrih cu Bawi a si tiah lei le dang vialte nih an phuan lai. biakam hlun i mi vialte cu Jehovah hmai ah an kun lai a ti mi cacang kha lak zau in Biakamthar ah cun Mi vialte cu Jesuh hmai ah an kun lai tiah a ti cang. A fawunak in chim ah cun Biakamhlun Jehovah kha Biakamthar Jesuh he sining aa khat mi an si ti kha si ko. Biakam hlun ah YAWEH lanwglanwg nih a co ding mi sunparnak vialte kha Jesuh nih a co ve lai cucu biakamthar cawnpiaknak a si.
Ruat chun hmanh Judah miphun caah cun Jehovah biafang hi a thiang tuk mi Pathian lawnglawng nih a ngeih mi min a si. Zeitindah jews background bak in a tthang lian mi Zultu pawl Peter, Paul te pawl nih fawi tein Jesuh min cu Jehovah min aiawh ah an hman khawh? Aruang cu Jesuh hi Jehovah a si ti fiang tuk in an rak theih caah asi. Biakam thar nih Jesuh cu YAWEH asi ti fiang tein a langhter.
Note: YAWEH le JEHOVAH cu aa khat mi an si caah cawhtthup in kan fak hman.
Discover more from Baibal Chung Ah Thuhmi Biathli
Subscribe to get the latest posts sent to your email.
