Ngakchia Tipil Innnak Hi Bible Ah A Um maw?

Ngakchia tipil innnak hi vawlei cung khuazakip ah Khrihfabu tampi nih an hman mi a si. Cun kan mah lai mi khrihfabu lak zong ah a hmang mi an tam ngaingai ve. Zei ruang ah dah ngakchia hi tipil an pek hna, bible ah tah ngakchia tipil innnak kong he pehtlai in zei tal a chim mi a um hnga maw? Ti hi biahalnak biapi ngai ah aa hun i cang. A tawifiannak te in hi biahalnak hi kan rak leh hmanh lai. Mah capar na rel hlan ah theih ding a biapi tuk mi cu hi ngakchia tipil innak hi vancung kainak le hell tlaknak biakhiak tu a si hrimhrim lo ti hi bia kilh ah hun langhter tak ka duh.

Zei ruahchannak le zumhnak he dah ngakchia cu tipil an pek hna?  

Tipil innnak hi Khrihfa kan si hmel chunhnak asi tiah an ti, Isreal caah cuarpar tan cu Pathian thim mi an sinak Hmelchunhnak ah rak hman mi asi bantuk in Tipilnak cu Khrihfa kan si hmel chunhnak a si ve tiah an ruah. An nih nih cun Biakam hlun Cuarpartannak le Biakam thar tipil innak hi a sullam aa khat mi asi an ti, hi kong he pehtlai in an i chirchan mi Bible cacang lak ah a biapi bik mi pakhat cu Kolosa 2:11,12 chung le Lamkaltu cauk chung i an chungkhar dihlak in tipil an ing tiah a langhnak poh khi ngakchia an i tel ve hrimhrim lai tiah an ruahdamh. An i chirchan mi Bible cacang tete hi pakhat hnu pakhat tawinak tein kan vunzoh hmanh lai. Pual nih Kolosa 2 chung ah a ttial mi tipil inn nak hi  Ngakchia tipil innak he cun pehtlaihnak a ngei taktak maw, asi lo ah a chim duh mi cu zeidah a si kun ne hnga?

Kolosa 2:11 nak ah Judah nunphung le zulhphung in a nung mi Kolosa khua Khrihfabu nih an fian khawhnak hnga tipil innak le Cuarpar tannak cu tahchunnak bantuk in a hun chim mi kan hmuh, a sinain a hme 12 nak zawn ah Tipilnak cu cuarpartannak he aa khah lo ning kha fiang deuh in a hun langhter than  (12 Baptisma nan innak ah khan amah he vuiṭi nan si i thihnak in a thawhtertu Pathian rianṭuannak nan zumhnak thawng in mithi hna lak in thawhter ṭhan nan si ve). A key biafang cu nan ZUMHNAK THAWNG IN ti mi te khi a si, tipil innnak ah cun a inntu zumhnak hi a biapi bik ah a chiah ti cu fiang tein a langh ter ko. Pual nih tipil innak le cuarpartannak a tahchunh tik ah an i lawh nak zawn te cu a um ti a fiang ko, an i khahnak le an i lawhnak cu cuarpartannak nih Pathian thim mi miphun an si a rak langhter bantuk khan, kan zumh hnu ah tipil kan innnak nih Pathian mi kan sinak a langhter ve ti tu khi a si, asinain a inn tu zumhnak tal lo in ngakchia tipil pek sawhsawh khi cu Pual chim mi a si lo ti cu al awk tha lo in a context nih a langhter ko.

A pahnihnak ah biatak tein an chirchan mi baibal cacang cu Lamkaltu chung chungkhar zei maw zet an chungkhar dihlak in tipil an innnak kong ah kha si, cu hna cu, (Lydia le a chungkhar Lamkaltu 15:16, Philipi thongtla pa Lamkaltu 16:30-33, Stephenus chungkhar 1 corn 1:16). An chungkhar dihlak in tipil an inn tiah Baibal ah fiang tein kan hmuh taktak hna, mah bal te cu hi Baibal cacang hna hi duhsah tein rak rel ve chun hmanh ngakchia an i tel nak kong zong a chim lo i, an i telnak kong zong a chim ve hlei lo,  asinain Lamkaltu 16:32 zawn na rel ah cun “Bawipa bia kha a mah le a inn chung i a um mi vialte kha an chimh hna” tiah a ti. Cu nih a langhter mi cu bia ngaitu hi bia a thei kho i a thleidang kho cang mi upa deuh si hna sehlaw a lo ngai.

Ngakchia an um lo ti cu bible nih a chim lo caah chim ve lo ah a tha ko, asinain an um hrimhrim ko ti zong bible nih a chim ve hlei lo caah fek tthup in i chirchan tlak a si ve hlei lo. Bible chung dih lak ah ngakchia tipil innak kong hi direct in voikhat te hmanh a langhhter lo, cu ruang fawm ah cun Ngakchia tipil innak cu Bible Ning a si lo kan tinak cu a si. An chim len ve ko lai nain Bible chung si lo in an mah ruahnak deuh lanwg te a si lai a ruang cu Bible ah char awk pakhat hmanh te hmanh a um lo. 

By. Zungawi Thawng