Baibal Lunghrinh Hi Sual Asi Maw?

Hi kong hi haltu an um pah caah ka zumhning a tawinak brin ka rak ttial lai, cun a biapi ngai mi biahalnak a si tiah ka ruah. A ruang cu Jesuh cu a zumtuk ko nain Bible hi a dihlak in Pathian thawchuah hnawhmi a si ti a zum kho lo mi tampi ka theih cang hna. Ka ruah tawn mi le kei mah le kei mah kaa hal tawn mi cu Baibal hi a dihlak in zum hlah ning law khamhnak co khawh si hnga maw? ti hi a si. Baibal zumh dih lo kan ti tikah a dihlak pakhat hmanh zumhlo khi si lo in tahchunnak ah “Jeim cakuat le Hebrew cakuat hi cu Pathian bia an si theng ha maw” ti bantuk khi ka chimduh mi cu asii. Uk 66 chung ah pakhathnih zumh lo khi si lai. (Adihlak zumh lo tu cu ceih awk um lo in zumlotu khi an va si ko hnga).

 

Cheukhat nih cun Baibal lunghrinh a hmang mi cu Thlarau volhpamh le Thiang thlarau ngeihchiatter phun khin an ruah, Reformation chan lio ah Pathian nih Khrihfa tuanbia letthaltu ding ah Khuaruahhar taktak in a rak hman mi Theologian minthang Martin Luther zong nih Jeims cakuat hi cu Baibal chung ah khumh ding aa tlak lo tiah a rak ti, Pathian nih thaw a chuah hnawh mi si dawh a si lo tiin lunghrinhnak a rak ngeih ve ko. Baibal lunghrinh ruangah vankai lo sisehlaw an nih zong hi Hell a kal ve ding a si hnga tinak a si.

 

Pahnihnak ah a tu i kan hman mi Biakam thar Baibal uk 27 hi Jesuh athih hnu kum 350 hnu lawng ah an rak khomh suat khawh mi a si. Jesuh zultu 12 hi an dihlak in AD 100 chung ah an thi dih, a hnu bik a nung mi lamkaltu Johan kha AD 95 hrawng tiang a rak nung ti a si, asinain AD 100 hlan ah a thi ve tthiamthiam, asi ah cun Biakam thar uk 27 Pathian thawhchuah hnawh mi asi tiah fehter a si hi Lamkaltu chan he kum 250 leng aa hlat tinak a si. Khrihfabu cu Pentecost ni AD 10 hlan ah aa rak thok cang va sikaw AD 10 in AD 350 karlak Khrihfabu hi Baibal (biakamthar) an rak ngei rih lo tinak asi, sihmanhsehlaw zumtu tha tuk an rak si tthiamthiam ve ko.

 

Khamhnak cu Pathian laksawng asi tiah Efesa 2:8-9 ah kan hmuh.8 Zei caah tiah vel an ngeih hna caah zumhnak thawng in khamh nan si i khamh nan si cu nanmah tuahnak thawng in a si lo, Pathian laksawng a si. 9 Thilṭha tuahnak in nan hmuhmi a si lo caah, aho hmanh nan i porhlawt awk a si lo. Khamhnak hrampi cu Pathian vel thanwg in asi i cu Pathian vel zumhnak thawng in thiam coter kan si. Roman 10: 9 Cucaah Jesuh cu Bawi a si tiah kaa in na phuan i Pathian nih mithi hna sin in a thawhter tiah na thinlung in na zumh ahcun khamh na si lai. Khrihfa nih khamhnak kan ti mi cu Jesuh Khrih zumh kha a si ko. Baibal cu a palh kho lo mi Pathian bia a si ti zumh kha khamhnak conak lam a si lo, a si hrimhrim lo. Khamhnak lam cu pakhat lawng a si i cucu Khrih zumhnak lawng kha asi ko.

Micheu nih nan ka hal ding mi cu, zeitin dah Baibal kan zumh lo cun Khrih khamhnak zong cu kan theih khawh kun lai? Baibal kan zumh ruang ah cun pei kan theih fawm cu nan ti men lai. Baibal uk 66 a dihlak zumh lo in Khrih zumh khawh tuk a si tiah kan leh hna hnga. Kan chim cang bantuk in Baibal pakhat hmanh zumh duh lo kha kan chim mi a si lo. Baibal hi Khrih thihnak le thawhtthannak lanwg te ttialnak cauk a si lo. Khrihfa nun a um, Doctrine a um zatlang nun a um a phunphun tialnak cauk a si. Baibal a rak um hlan ah Khrihfabu kum 400 dengmang a rak kal cang va si kaw. Hi kum 400 lengluang chung ah Bible (biakamthar) lo in khrihfabu a rak dir i zumtu tha zong tamtuk an rak um ko. Apostle pawl an rak nun lio cu an mah pei an rak nun rih cu ti khawh a si hnga, asinain Apotle an Dih lak in an thih dih hnu ah Khrihfabu Baibal (biakamthar) lo in kum 350 chung fek tthup in a rak dir ko. Cu lanwg si lo khrihfabu chung ah zumtu thar an rak I chap zungzal tthiamthiam ko ti cu khrihfa tuanbia ah al awk a tha lo mi biatak asi.

 

Note: keimah hi baibal cu Pathian thawchuah hnawh mi a si i a palh kho lo mi Pathianbia a si ti a zummi ka si. Asinain baibal lunghrinh cu khamhnak he aa sai lo ti zong ka zumh fawn. khamhnak an co hnu ah duhsah in Baibal cu a palh kho lomi Pathianbia a si ti an zumh khawhnak hnga ttuanvo kan ngei tinak tu khi a si hnga.