Baibal Nih Nu Pastors Ṭuan A Onh Hna Lo

Khrihfabu hruaitu ah nu hi rian khinh awk an si maw (hlei in pastor rian)  ti hi chanthar ah biatak tein an i al tawn mi topic pakhat asi. Tuchan ahcun khrihfabu tampi nih biakinn ah nu pawl zalong tein phungchim nak nawl an pek ko hna. A cheu khrihfabu ahcun nu zong pastor rian an khinh ko hna. Asinain hi kong ah Baibal nih zeidah a chim? Ti mi kan rak zoh hna hmanh lai. Paul nih nu cu cawnpiaktu si hna hlah seh ati tikah an mah chan lio judah nunphung hoih in a chim mi maw asi, asi lo ah a tu kan chan ah hi baibal cacang hi hman awk a tha ti maw?

A fiang tuk mi baibal cawnpiaknak

Pathian nih cathiang chung ah Nu rian le Pa rian cu fiang taktak tein a thleidan cia ko tiah ka ruah (a hleice in khrihfabu chung cawlcanghnak ah). Hi kong hi cu i titer hrim lo ahcun fian lo awk zeihmanh khi a um lo. Chanthar he aa keih le keih lo kha cu a dang te ah chia phut rih usilaw a tutan cu Baibal he aa keih le keih lo zoh tti ding in kan sawm hna.

(1 Timothy 2:11-12 Nu cu cawnpiaktu si loin a cawngtu an si awk a si, cun an cawn tikah daite le toidornak lungthin ngei in an cawn awk a si. 12 Cawnpiaktu si awkah ka duh hna lo, pa cung i nawl ngeitu si ding zongah ka duh hna lo; dai tein an um awk a si ko.13 Adam pei ser hmasa a si kha, amah hnuah pei Evi cu ser a si kha)

Paul nih nu cu cawnpiaktu si awk ah a duh hna lonak a ruang hi a cung tang tha tein na rel ah cun Judah nunphung ruang menmen ah a si hrimhrim lo ti a lang. Baibal chirchan in a chim mi asi. Paul nih nu cu Pa cung ah nawl ngeih ter hrimhrim khi a duh hna lo mi cu asi, a ruang cu Pathian nih Pa (Adam) a ser hmasa caah a si tiah a ti. Paul nih Judah nunphung hoih in a chim mi a si lo ti cu a fiang, Baibal hrambunh in a chim mi asi. Hi hi a hram thok tein Pathian timhtuah cia mi asi kha a langhter. Cucaah minung nih kan chan he aa tlak ning in a lu le taw kan mer lengmang awk a si lo.

Nu le Pa kan i tlukruannak

A cheu nih an i thawh i khrih ah bawi le sal, nu le pa ti a um lo kan i khat dih an ti. A hman mi a si, kan thlarau man a ngeih ning hi khrih ah aa khat dih mi kan si ko hna. A sinain nu nih a ttuan ding mi le pa nih a ttuan ding mi rian cu aa khat lo. Cucu baibal chung in siseh Baibal leng vawlei thil sining cuanh zong in al awk a tha lo mi asi ko. Kalati 3:28 ah nu le pa kan i khat a ti mi hi rian khinhnak ah si lo in thlarau ah a niam hlei le a sang hlei kan um lonak kong achim duh mi asi.

Nu cu cawnpiaktu si hrimhrim maw an ngah lo?

Nu nih an mah nu hawi le ngakchia pawl kha an cawnpiak hna awk asi, baibal chung zong ah nu cawlcanghnakhmun tampi ah a um len ko (Titus 2:3-5, 2 Timothy 3:14-15). Nu cu zeihmanh tuah hna hlah seh ti kha si lo in, pa cung i nawlngeihnak pek hi baibal nih a onh hrimhrim lo mi cu asi.

Zeiruang ah dah hihi a biapit tuk?

Baibal nih fiang tein a langhter ko mi cawnpiaknak kha khrihfabu nih kan cohlan duh lo i, kan nunphung he aa keih ning hoih in kan merh ahcun, cucu Pathian bia nawlngeihnak zei kan rel lo asi. Baibal hi chanthar nunphung hoih in remh lengmang awk a si lo. Kan nunphung tu hi Baibal he kan keihter awk a si deuh. Nu caah namneh deuh le thleidan deuh zong a lo kho man. Asinain Baibal nih fiang tuk in a chim ko caah thim awk a um hlei ti lo, cohlan a hau mi Baibal cawnpiaknak biatak a si.

Donghnak

Nikhat kar ah thil sining tamtuk aa thleng mi vawlei a si bantuk in, hlanchan nu dirhmun le tuchan nu sining zong aa khat ti lo ti cu al awk um lo in hmuh cio asi. Nu cu hruaitu si hna hlah seh tiah biatak te i aupi hi chanthar hmuh ning ahcun zoh dawh lo ngai, ningzak thil a si cang. Asinain mah kong hi aa thleng bal lo mi Baibal thiang nih fiang tuk in a kan cawnpiak mi a si.

Baibal biatak ah hram bunh aa tim mi zumtu nih cun baibal biatak hi kan cohlan i fek tein kan dirkamh a biapi tuk hringhren. Chan le caan hoih in kan baibal hi merh chokcho i tim hlah usih. Nu cu Pathian nih rian tamtuk a khinh ko hna. Cu hna lak ah an rian nganbik cu chungkhar zohkhenh le fanu fapa cawnpiak hi a si.