Khrihfabu le Israel An I Dannak
Biakam hlun chan ah an rak pek bantukin nihin ah pehzulh in cheuhra kan pek a herh ti maw timi bialehnak caah a pakhatnak i kan ruah chih a herhmi cu Khrihfabu le Israel kan i dannak kong te hi a si. Theologians thenkhat cu khrihfabu hi chanthar Israel a si cucaah Israel nih an rak tuahmi pawl zeimazat cu nihin khrihfabu chan zongah pehzulh in kan hun tuah awk a si tiah a zummi an um. Tahchunhnak ah cheuhra hna hi Israel nih an rak pek bantukin pehzulh in chanthar Israel a simi khrihfabu nih pehzulh in kan pek awk a si tbk..
Khrihfabu cu new-Israel kan si lo i Israel zong khrihfabu a si ve lo. Israel cu taksa in Jacob nih a rak hrinmi tefa hna kha an si i khrihfabu cu Jesuh nih a thisen in thlenhmi, cawkmi amah a zumtu phu kan si. Israel nihcun tlangbawi hmang in Pathian an rak biak, cheuhra an rak pek, saram rai an rak thawi, ulh amhmi tampi an rak ngeih, cu hna cu anmah caah khan Pathian nih phung a rak serpiakmi hna a si ko i khrihfabu nih pehzulh in kan tuah ding rian an si lo. Kan thawhkehnak aa dang i kan function zong aa dangmi kan si. Cucaah, Israel mi hna sinah rak pekmi nawlbia kha khrihfabu nih kan zulh ve a herh ti lo. Israel nih Moses nawlpek an rak zulh bantukin Khrihfabu nih Jesuh le Apostles hna cawnpiaknak kan zulh ve ko lai.
Cheuhra hi Nawlbia lak ah Pakhat a Si.
Cheuhra pek hi nawlbia 613 lak ah aa telmi pakhat a si ve. Lev 27:30-34 chungah cheuhra vialte Pathian ta an sinak kong kha fiang tein a langhter. Israel miphun hna nih cheuhra pek cu nawlbia hmanh ahcun a biapi bakmi ah rak ruah a si caah Jesuh chan tiangah tha tein an rak zulh i an ngeihmi lak a hme bik a simi putinan tiang in cheuhra cu an rak pek khah. Anmah nih cun Pathian fialmi nawlbia kan zulh tiin an lung an rak i hmuih ngai khah. Sihmanhsehlaw, Jesuh nih a thawh hna i “Nan caah ngaihchia a va si dah, zei ca tiah putinan tiang in cheuhra nan pek nain a sinain cu nak in a biapi deuhmi dinnak, zaangfahnak le zumhtlak sinak tu cu nan tuah lo” tiah a ti hna. Hi zawn ah a biapi in langhter ka duhmi cu cheuhra cu Israel mi hna sinah pekmi nawlbia 613 hna lak ah pakhat a si tihi a si.
Cheuhra Cu Levi hna Caah Pekmi a Si.
Cheuhra cheukhat cu Pathian nih Levi miphun sinah a biakin I rian an tuan man ah a rak pek hna. Number 18:21 ahcun Pathian nih “Cheuhra cheukhat vialte cu ka Biakin an rianh ruangah Levites miphun hna sinah ka pek cang hna” tiah Moses sinah a rak chim. Israel miphun vialte nih an rak pekmi cheuhra; ti le rawl, phaisa, sui le ngun vialte kha Levi mi hna nih khan an rak i lak dih. Sihmanhsehlaw, anmah Levi mi hna nih khan anmah le an tinco ciomi chungin cheuhra an pek ve i cucu biakin zohkhenhnak caah an rak hman. Cucu a tuchan khrihfabu he cuai kan thlai chun a si ahcun cheuhra kan pek mi vialte kha pastor nih a co dih lai i cu chung tu cun a herhning in biakinn zohkhenhnak caah a hman ve lai tinak khi a si hnga. Sihmanhsehlaw, Bible cawnpiaknak a si ko bu ah cu idea cu a hohmanh nih kan zul duh fawn lo. Kan Pastor sinah cheuhra vialte pek cu chim loin kan hmuhmi chung in 5% hmanh Pastor lahkhah ah kan kal ter siang fawn lo. Biakam hlun bantukin cheuhra kan pek bak a herh tiah kan ti ahcun kan hmannak zong aa khah awk a si. Hi nihhin fiang tein a langhtermi cu cheuhra kongah Bible cawnpiaknak zulh kha kan duhmi siloin a phaisa te lawng kha an duhmi cu a si tinak a si.
Biakam Thar Peknak Kongah Paul Cawnpiaknak
2 Cor 9:7 chungah Paul nih peknak kongah a chimmi fiang tein hmuh a si. “A hop oh nih sian lo bu in le hnekchom in siloin a thinglung chung in aa timh ning tein pe ko seh” tiah a ti. Biakam hlun ahcun an sian zong sian lo zongah hnek chom in pek ter an rak si. Asinain Biakam thar ahcun hnek chom in siloin sian bu tein kanmah le kan i timhning tein pek kha a kan cawnpiakmi a si. Khrihfabu chungah cheuhra pek a hnek in hnek Ii tlerhkhonnak caah min cazin hna lak khi Bible cawnpiakmi a si lo. A petu nih lungtho tein pek seh! cucu Pathian lungthin a zohtu Pathian nih a cohlanmi peknak cu a si. Hnekchom pekmi cu Pathian nih a cohlanmi a si lo tihi kan theih peng a hau. Cucu kan theih ahcun biakam hlun cheuhra pekning kan zulh a herh lo zia kha fiang tein na theihthiam ko lai. Kan ngaihchiah le kan sui ngun in Pathian lung kan ton khah lai tiah ruat hlah. Mi hmai ah i uang thlarnak ah maw, mihmai khah lo ruangah maw na pekmi khi Pathian nih zeihmanh ah a rel lo. Pathian cu lungthin a zohmi a si i thinlung put dik he kan pekmi lawng Pathian nih a cohlan. Amah belte, khrihfabu le Pathian caah pek sian loin kan um ve sual ahcun cucu Pathian duhmi a si fawn lo. Cheuhra theng kan pek lo zongah Pathian biakin zohkhenhnak caah le kan Pastor te zohkhenhnak caah lungtho tein kan pek ve zungzal awk a si. Pathian nih a kan kamhmi cu, nap ek ahcun tam chinchin pek na si lai, van cung ah na chawn a khon a si tbk hna kha an si. Cu bantuk motive he cun pe hna usih.
Biafunnak (Conclusion)Chim ding tampi a um rih nain ka donghter lai. Cheuhra cu Levi mi hna zohkhenhnak caah pek dingin Pathian nih Israel miphun hna nawl a rak pekmi hna a si caah khrihfabu nih kan zulh a herh ti lo. Kan zulh a herh rih ko kan ti ahcun cheuhra a dih lak in Pastor sinah a kal ve awk a si i anmah nih a herh ning in biakin caah an hman awk a si. Cucu kan cohlan tung lo ahcun a cheuchum lawng in zulh cu sullam a ngei lo. Khrihfabu cu peknak kongah a dang tein cawnpiak kan si ve i cucu lungtho thanuam tein le sian tawk tein pek kha a si. Pathian cu lenglang tuahmi ah aa lawmmi a si lo i chunglei lungput a zohmi a si caah nawlbia bantukin hnekchom in peknak nih a lawmh ter kho lo. Lungthin tak tein kan peknak lawng nih Pathian a lawmhnak ter caah cheuhra system hi cu khrihfabu chan ahcun kan tuah awk a si ti lo tiah ka zumhnak cu a si.
Author: Tha Ceu Lian (M.Th)
Discover more from Bible Chung Ah Thuh Mi Biathli
Subscribe to get the latest posts sent to your email.
