Tulio cu kan ram, ramkhel kong ah kan mah le umnak hmun cio in kan thi lai maw kan nung lai dah tiah kan buai tuk lio pi ah ruah lo tuk in lihnin nih a vun kan den than tikah kan lung a rawk tuk cio theu lai dah. Kan mah le kan pawcawmnak le kan tuahmi thil cio hmanh ah zangtlung lo in kan um cio lio a si.
Nihin tiang ah a lihninh ruangah a thimi 3000 fai le hliam a tuarmi 5000 leng si dawh kan si cang. UN General Secretary nih a vun chim ning ah kawlram chung ummi minung pa 3 chungah pa 1 nih harnak an ton ti a si. Kan inn chung ah a tlungmi harnak cu kan mah tein kan I tawlrel khawh lo caah inn pa chakthlang in khua sempang tiang nih zuan hnawh hau ah kan I cang. Ram tampi nih an kan zuanhnawh I an kan bawmh lio ah can tha rak I lak in heh tiah ral ka tuu ti bang in, mah le fale le innchungkhar sinah buainak a rak chuahpi mi le rallo a rak tuu mi zong an rak um ve rih hui.
Lihninh nih a chuahpi mi harnak hi cu chim len hau lo in a ton in kan tonmi a si caah chim lo in um ko ning law. Lihninh nih kan theih lo kar ah minung caah thatnak a chuahpi mi zong a rak tam ngai ve. Tahchunhnak ah atu Himalayas tlangthluanpi zong khi kan hnu lei kum tampi lio a kawlram lihnin bantuk nih hin a sersiammi a si ti a si. Tikulh a rak um bal lo mi zong a um ter khawh ti si. Cun Vawlei tang in a chuakmi thil pawl, sui, Diamond le Zinan Gas le a dangdang pawl, thuk pipi ah a ummi kha puan te ah a chuahpi hna ti si.
Bia peh ah a tu kan tonmi lihnin ruang ahhin ramdangmi tampi nih kan kawlram ramkhel a chiat ning hi tampi an hmuh lai,an theih lai I ramkip nih a tu hlan nak in siaherhnak a kan ngeih deuh men lai ti hna hi vansan ah ruah pah cio a si. A tak zong s ihram sehlaw tha tuk hnga.
Bible chungah lihnin kan hmuhmi hna le zeiruang ahdah a can tawn ti hi tlawmpal in vun zoh ta hna usih. Pathian nih Israel miphun caah siseh nihin Khrihfabu caah siseh kan sunhlawih tukmi nawlbia pahra Moses sinah a rak pek lio ah khan Sinai tlangpi kha a hnin dih e a ti. (Exodus 19: 18). 1 Siangpahrang. 19:12-13 zong ah Elijah chan ah li a hninhnak kong a chim. Cun Jesuh Vailamtah cung I a thih lio zongah Li fak piin aa hnin I biakthlam chung I puanzar zong kha a tlek I thlankhar zong kha an I hung dih hna e a ti (Matt.27:45-55). Hi ka ahhin Lihnin hi Pathian nih zeicah dah a chuah ter ti ahcun thlarau lei ah thlennak nganpi a chuahnak caah a hmanmi a si. Nihin kan ram nih kan tonmi zong nih taksa lei he thlarau lei he thlennak nganpi zong a chuahpi khawh men mi asi.
Bible chung i lihnin kan hmuh paoh ahhin Pathian khuaruahhar tuah a timh can le hmelchunhnak pakhatkaht hmuhsak a duh hna can le biaceihnak asilo ah a thinhunnak langhter nak hna ahhin a hman tawn. Cun voihnihnak a rat than lai nak hmelchunnak zong ah a hman ve,
Atu bantuk in harnak fakpi kan ton tikah thlacam hmang tuk lo zong thlacam kan hmannak ah a cang kho men, Pathian lei thinlung pe tuk lo zong nih Pathian sin ah I pek deuh duhnak thinlung zong a kan ngeihter khawh men. Cu nak in a sunglawi chinchin mi cu zumlotu tampi nih harnak an ton lio ah can tha ah I lak in bawmhnak pek pah in Jesuh Khrih khmanhnak thawngtha, khrihfa tampi nih an chimh khawh hna hi lawmh a um taktak khi a si.
A sau deuh sual lai mah vial hin si rih sehlaw a hnu ah kan peh than te lai…
Discover more from Bible Chung Ah Thuh Mi Biathli
Subscribe to get the latest posts sent to your email.
