Holhtheihlo kong hi laimi lak zong ah a hnok ngai mi topic pakhat a si, ngaihchiat awk ngai a si rua tiah ka ruah mi cu Bible thiamsang pawl nih Bible ah kan kir than a hau tiah an aupi cuahmah lio ah laimi khrihfabu tampi cu Charismatic movement nih a khuh bak in khuh a kan timh ve cang mi hi asi. An min hei chim ko ning law AG, UPC ti pawl le bang nih cun holh theihlo hmanh na holh khawh lo ah cun khamh na si rihlo tinak a si an ti, holhthiehlo hi khamh kan sinak a langhter cu tete a si titiang in an khtihfabu an cawmpiak hna. Baibal i tleih in pulpit cung ah an vun au ve ahcun zeitik hmanh ah baibal a kau bal lo mi cheukhat members pawl cu an lung aa tuai cang, mi zapi nih aa hrintthan lo rak ti lai an phan caah an lih in heh tiah holh theih lo holh in khamhco cang mi an sinak cu tete piah khawh an i zuam cio, biatak tein a cawng mi zong an um len, cucu kal sualnak hrampi taktak cu asi.
Baibal cu Pathian nih cawnpiaknak hman lo mi remhnak caah pek mi a si bantuk in Baibal hi kan tahfung a si zungzal awk a si, khrihfabu hi lam ding ah maw a kal, a silo ah lam kawi lei dah a panh ti kan theih khawhnak hi lam dang zeihmanh a um lo, Baibal in tah hnu lawng ah theih khawh a si. A si ah cun a tuchan nih holhtheihlo, vanholh, vanhla tiah kan ti mi hna hi an hman le hman lo theih kan duh ahcun Baibal in tah an hau tinak khi si. Baibal nih a chim mi kan zoh hna hmanh lai.
Holhdang (holhtheihlo) kong biatak tein kan hmuhnak hi baibal uk 66 chung ah cauk pahnih te lanwg ah asi,
PaPakhatnak Lamkaltu 2, 10, 19
Pahnihnak 1Korinthian 14
Hi pahnih hi baibal nih a ngeih mi holhdang kong aa tialnak cu an si. Lamkaltu in kan rak thok hna lai.
Lamkaltu 2 kan rel ahcun khuaruahhar in Pathian tthawnnak aa langh i zultu pawl nih an chim mibia zong bia ngaitu nih an mah holh cio in an rak theih cio nak kha kan hmuh (Lamkaltu 2:4). zumtu pawl nih an holh mi cu khua zakip i a ra mi Judah mi nih an mah le holh cio in an rak theih i an khuaruah ahar tuknak kha kan hmuh. Hi kaa ah hin theih a herh tuk mi cu zumtu pawl nih an rak holh mi hi holhtheih lo a si lo theihkhawh mi holh (minung holh) a si ti kha fiang tuk in a lang. Aphi cu Lamkaltu 2 chung kan hmuh mi holh hi holhtheihlo si lo in holhdang (minung holh) a si ti kha asi.
1 Korin 14, hi a dihlak in Paul nih holhdang (holhtheihlo) kong a ttialnak a si. Hi hi zumtu cheukhat nih an lak riangmang i Paul nih a ngan 14 chung a dihlak in holhtheihlo kong a ttialnak a ruang cu a biapit tuk ruang ah a si an ti. Asinain kan theih a herh tuk mi cu Korinthian Khrihfabu hi sualnak vialte a tlinh dih cikcek i a buai taktak mi khrihfabu an rak si. Kuatkhatnak Korin cakuat na rel ah cun a hramthok in a dongh tiang khrihfabu ningcang lo in khua an saknak lawng te pakhat hnu pakhat in na hmuh lai. Cu chung ah cun holh theihlo (holhdang) kong hi Paul nih a telh ve. A ruang cu holhdang (holhtheihlo) hi ningcang lo taktak in an rak hman ve tinak a si, cu nih alangter mi cu holhtheihlo a biapit tuk ruang ah a tampi rak ttial mi si lo in holhtheihlo kha ningcang lotuk in an rak hman ruang ah si deuh dawh asi. Paul biachim tha te kan zoh tikah Korinthian Khrihfabu nih holhdang (holhtheihlo) an rak hman ning hi tuchan an holh mi bantuk in ningcang lo ngai in rak holh ve dawh an si. Paul nih holh hlah uh a ti hrimhrim hna lo asinain nan hman ahcun ningcang tein hmang uh a ti hna. Ningcang te hman cu zei tin a si ti kha a tang lei ah Paul nih a langhter mi phun 2 te in kan rak zoh lai.
Pakahtnak nan holh ah cun a lettu an um hrimhrim awk asi, a lettu a um lo ah cun holh hlah seh a ti (1 Korin 14:27ª).
Pahnihnak tuai lulh in chim cio hlah uh, a chaan tete in nan chim lai cun a lettu nih pakhat hnu pakhat in an leh piak hna lai a ti(27ɓ). Mah umnak hmun in duh ning poh rak holh len kha Paul nih um hlah seh a ti mi cu si. 1 Korinthian 14 hi a dihlak in rel ah cun Paul nih holhdang a timi hi holhtheihlo a si lo, theih khawh mi holh kong a chim ti cu al awk tha lo in na fiang ko lai. Cucucaah aphi cu Korinthian 14 ah Paul nih holhdang ati mi hi tuchan nih kan hman mi holh theih lo bantuk si lo in theihkhawh mi holh (minungholh) a rak si ko ti a fiang.
Paul nih holhtheih lo kong ah zulhphung aser mi pahnih te hmang in tuchan zumtu kan hman ning vun tah chunh hna hmanh usih. (1) A lettu um seh (2) A bubu in holh hlah uh, Chaan tete in a tambik 3 lanwg nih (14:27). Lai mi lakah holhtheih lo a holh mi a tamtuk ka theih cang hna nain a lettu pakhat hmanh ka hmu bal rih hna lo. Cun an holh mi biafang khi ngai hna ulaw minung holh an si le si lo cu na theih ko lai, leh timh zong ah leh khawh phun an si lo. Cun laimi cu holhtheih lo in mi pakhat nih a thok cang ah cun kan ral tha cio i pumhnak inn ah lung hna ngei lo in kan dihlak tein kan holh dih hui. A zei ti lei hmanh in Baibal nih a kan serpiak mi zulhphung cu kan nganh cikcek ko rua tiah ka ruah. Cheukhat nih 1 Korinthian 13:1 i “van holh” a ti mi khi holhtheihlo tiah kan i kuih. Vanmi cu Baibal chung ah voitampi an holhnak kan hmuh hna nain holhtheihlo an hmang bal lo, minung holh tein an holh ve ko. Korinthian 13 a dihlak in knn rel ah cun “Tlang tthial khawhnak zumhnak zong ka hei ngei ko hnga” tibantuk (asi kho lo mi si kho bantuk i chimnak) tlang tthial khawhnak zumhnak cu a mah Paul zong nih a ngeih khawh mi a si ve hlei lo, asinain achim duh mi cu zeibantuk minung hmanh khi hei si law dawtnak ngeih lo ah cun zeihmanh san atlai lo ti langhter duh a chim mi an si.
Tlangkawmnak
Lamkaltu 2 i zumtu nih an rak hman mi cu theih khawh mi minung holh a si, 1 Korinthian 14 i Paul nih holhdang a ti mi zong minung holh asi, van mi zong baibal chung ah holh theih lo in an holh bal lo, Cucaah tuchan zumtu cheukhat nih kan hman mi holh theih lo hi cu Baibal in cun tah khawh phun zong khi asi lo, cukaa Baibal cacang cu kaa chirchan ti awk a ngeii bak lo mi, ruahnak cungah aa hngat mi zumhnak asi tiah ka zumhning asi.
Note: Subscribe nak ah na Email rak ttial law, kan article fawi tein nangmah Email ah kan in kuat peng lai.
Discover more from Baibal Chung Ah Thuhmi Biathli
Subscribe to get the latest posts sent to your email.
