Hruaitu Tha Kan Herh

Hruaitu Tha

Nihin kumzabu 21 kan vawlei cu a thancho ning a rang tuk I zapi nih cun dawi khawh a si ti lo, a hnulei ah aa thlaimi kal taak mi hi mino lak zongah kan tam ngaingai ko. Minung nih an fimthiamnak in Pathian lonh le chawhkanh an timh cuahmah lio a si.

Cu lak ah a um vemi le aa cawh vemi zumtu pawl nih zeitindah kan biaknak kan kil ven ding a si lai, ti hi tawi tein thinlung chung chuak bia te vun thai tak ka sia herh. A bik in khrihfa hruaitu pawl ttuanvo nganpi kan ngei. Paul nih Ephisa khua khrihfabu ah pastor a tuanmi Timote sinah ca a kuat I cu ah cun aa telmi cu “ni donghnak ni ahcun mitam pi nih Pathian kha an hlawt lai I, anmah nih theih an duhmi a chimtu kha an kawl can a phan lai” tiah a ti (2Tim.4:1-5). Nihin Khrihfa tam pi nih Pathian biatak nak in kan mah nih theih kan duhmi tu biapi ah kan chiah I, Pathian bia a si kan theih ko zongah kan duh lo phun cu kan ngai tuk ti lo.

Ram thangcho deuh hawi hna ah cun zeitluk in dah Pathian kan doh cang ti ahcun Pathian nih minung cu nu le pa lawng in a ser I nu kha nu a si ko I, pa kha pa ti a si ko. Sihmanhselaw nihin ah cun nu a simi paoh kha nu tiah na ti kho ti lo I, pa a simi paoh kha pa tiah na ti kho ti lo. An Nu sinak le an pa sinak an ngeihmi thil nih lai a rel kho ti lo I anmah pumpak biakhiahnak kha biapi ah an chiah piak cang hna.

Cu thil cu zeiruang ahdah a can ti ahcun Liberal(kautuk) tuk in khuaruahnak, a si lo ah pumpak zalonnak kha fak tuk in cawnpiak ruangah a si. Lai tlang zong ah Nitlak lei ram nih a kan hip khawhnak tampi lakah pakhat a si ve mi cu “Right” ti hi a si. An duhmi tuah thlauh paoh ah khuate fa zei thei rua lo ti mi zong nih ka right a si ti cu kan thiam ngai cio cang.

Pumpak nih zalonnak kan ngeih cu a tha ko I a hman fawn ko nain vawlei cung sualnak vialte hi pumpak zalonnak ningcang lo in hmannak ruangah a si. Khrihfa riantuantu hna nih kan mibu hi anmah duhnak maw kan zulhpi hna lai asiloah Pathian duhnak dah ti hi thil biapi ngai a si. A tang lei ah Moses hruaining le Aaron hruaining hi tawi te in zohti hna usih.

Kan theih cang bantuk in Israel miphun cu BC 1446 lio hrawngah Ezipt ram ah kum 400 chung sal ah an rak tang. Pathian nih Moses kha a miphun Israel chuahpi dingah a fial I a upa Aaron he an chuahpi hna. Minung tingruk leng cu an chuahpi hna I, Ezipt ram, Israel miphun an umnak hmun Goshen in sau an kal manh hlan, meng 30 in 60 hrawng lawng an kal ah Moses cu an zeih ciammam I a tam deuh nih Ezipt ram ah kir than an duh, a tulio holh in cun democracy uknak ti phun in, a tam deuh hnatlaknak la hna sehlaw an kir diam cang hnga. Nain Moses nih cun a tam deuh duhnak si lo in an caah a thami tu kha a thim piak hna I meng 200 hrawng an kal tiang cu an phun pah le an zai pah tein hmai lei ah an kal ceomo kho hna.

Ezipt in Sinai tlang tiang an phak hi thla thum hrawng an rau ti si (Exo. 19:1). Cu ah cun Pathian nih Moses cu Nawlbia pek dingah Sinai tlangpar kai dingah a auh caah ni sawmli a va rau cu kar ahcun Aron nih a rak hruai chung hna I Pathian duhning le an caah a tha lai timi lam zulhpi ti lo in mitam deuh duhnak in an kut an hler ciammam cu Ezipt ram in Canan ram ah a kan hruaitu ah sui cawfa kan ser lai ti si ko. Anmah nih an serchommi Sui cawfa nih a kan hruai kho lo ti cu an theih ko nain an duhmi a si caah an ser diam ko. Pathian thinhunnak a alh ciammam I cu ni ahcun minung 3000 a thah hna.

Cucaah nihin ah Pathian khrihfabu nih, kan minung hawi nih an tuah cio ko ti phun le chan ti luan kan dawi kho ti phun in Pathian nih a duhlo mi zong Pathian biatak hmang in a remh duh lo mi le a remh ngam lo mi le mizapi kha a thami le a hmanmi lam ah hruai lo in kan mibu nih an duhmi poah a zulmi le a tuahmi  si hna hlah usih. Aron leadership siloin Moses leadership hi Pathian nih a kan duh piak deuhmi si dawh i a lang ko.