Catholic Church an i cawnpiak ning ahcun, khamhmi kan si khawhnak hnga Baptism hi a herh hrimhrim ko tiah an zumh. Ti chungah kan hun i hnim bak khin kan sualnak vialte thianh piak kan si e an ti. Tipil in cu kan pum a hnawm mi kholh sawhsawh khi asi lo an ti i Bible an i chirhchan mi cu 1. Peter. 3:21-22, Matt. 16:16 hna hi an si.
Cu bantuk in Tipil in nak nih khamhnak a kan pek taktak, tipil kan in bak in Pathian hmai ah a thiangmi le cohlan awk a tlak mi fa ah kan hun i cang tiah a zum mi Denominations an rak tampi. E.g Eastern Orthodox Church, Lutheran Church, Churches of Christ, Oneness Pentecostal Movement etc…..hna pawl hi an si.
Tipil in cu zei dah asi?
Tipil in nak nih, zumtu hi zungzal nun-nak a kan pek taktak lai tiah na ruat bal maw? Bible nih tah Tipil in nak kong he pehtlai in zei tin dah a kan cawnpiak timi a tawi nak tein hun zoh tti hna usih ti ka duh.
Jesuh Khrih cu ka khamh-tu le ka Bawi asi tiah kan zumh i Tipil kan in mi a sullam cu, kei zong Jesuh Khrih thihnak nak ah ka thi ve i a thawh tthan-nak ah ka tho ve lai timi teh-te zapi hmai ah kan langhter tu khi asi.
1. “Symbolic Death and Resurrection” Tipil in cu zumhnak in Jesuh Khrih a thihnak ah ka thi ve i a thawh tthan-nak ah ka tho than ve lai timi hmelchunhnak asi. Ref. Rom. 6:3-4, Colo. 2:12.
2. “Identification With Christ” Zumhnak in Tipil kan in tik ah, Jesuh Khrih ah mi zei dah kan si ti kha a langhter. Cucu Tipil kan in ruangah si loin kan zumhnak ruang tu ah asi. Ref. Gala. 3:26-27.
3. “Membership in the Body of Christ” Zumhnak in Tipil kan in tik ah, Jesuh Khrih ah member tling kan si ve cang timi a langhter tu khi asi. Ref. 1. Cor. 12:13.
Tipil in nak nih zum-tu hi khamhnak a kan pe bal lo tihi Bible cawnpiakning Biblical Teaching cu asi. Bible chung kan zoh tik ah, Tipil in hnu ah an zumh timi na hmu lai lo, zumhnak tu a ra hmasa peng lai. Acts. 2:40-42 kan zoh tik ah Peter nih thawngttha a rak chim i minung 3,000 tluk nih Jesuh Khrih cu an rak zumh i Tipil nak an rak ing.
Mark. 16-16 ah Jesuh nih tihin ati, a zum i Tipil nak a ing mi poh nih khamhnak an hmuh lai, a zum lomi poh nih cun sual phawtnak kha an hmuh lai tiah ati. Jesuh Khrih nih a zum lomi poh cu sual phawt an si lai tiah ati Tipil a ing lomi cu sual phawt an si lai a ti lo. Asi ahcun, Tipil in hi a herh maw herh lo timi biahal nak a um kaho men. Asinain, tutan ah focus ka duhmi asi lo caah ka rak langhter lem lai lo.
Khamhnak cu Pathian laksawng asi caah, Tipil in nak he pehtlaihnak a ngei hrimhrim lo, khamhnak cu Pathian vel asi i cu a vel cu zumhnak lawnglawng in kan co khawhmi asi tihi Bible cawnpiak ning cu a rak si. Ref. Eph. 2:8-9, Rom. 3:24-25, Rom. 10:9-10.
Jesuh Khrih vailam an rak khenh lio ah khan, a vorh-lei mifir pa nih Bawipa kei zong siangpahrang in na rat tik ah ka philh ve te hlah tiah ati. Cupa cu Jesuh Khrih nih nihin in keimah he Paradise ah naa din lai tiah a leh. Luke. 32:42-43. Hi mifir pa hi Tipil a ing hrimhrim lo. Asinain, a zumh nak thawngin Pathian nih khamhnak tling a rak hrawmh ve.
Author: Van Tha Uk (M.div)
Discover more from Bible Chung Ah Thuh Mi Biathli
Subscribe to get the latest posts sent to your email.
