Khaukhih Kongah Baibal Cawnpiakmi

Khamhnak A siloah Zungzal Nunnak Caah Khaukhih A um Maw? Khaukhih kong hi B.th ka kai lio ah ka hawipa Biak Peng Lian he kan rak I al zungzal tawn. Kei nih Bible charhchan ngei tuk lo khin Khaukhih a um lo ka rak ti i ka kawipa nih cun Bible ah cun Khaukhih ti a um ko tiah a rak ti ve I Bible cacang zong tampi kan rak relti tawn a donghnak ah cun Bible ah fiang tein a tial mi a si caah Khaukhih um ti lei ah lung si lo bu tein kaa fon than ve.

Bible ah khaukhih a um maw ti ahcun a um lengluang hinta ti khawh a si. Pakhat hnu pakhat in vun zoh tuah hna usih.

Khamhnak/zungzal nunnak caah khaukhih: Eph. 1:4-5 Vawlei ser hlan in Pathian nih amahmi si awk a kan thim tiah a ti. 2Thess.2:13 Pathian nih a hramthok tein Khamhnak co dingah an thim cang hna tiah a ti. John 15:16 Nanmah nih nan ka thim lo keimah nih kan thim hna tiah a ti. Hi kaa Bible hi a cheukhat nih khamhnak caah si lo in riantuan ding ah thimnak kong a si tiah an ti. Asinain ruah awk a um ve rih mi cu Pathian nih a rian tuan dingah a thim mi cu khamhnak a co lo mi a si hnga maw ti hi a si? Pathian riantuantu cu khamhnak a co hnu ah Pathian nih a riantuantu dingah chiti a thuh hna ti cu a fiangmi a si.

Jesuh nih John 6:37 ah a chimmi cu ka pa nih a ka pek mi paoh cu ka sin ah an phan lai a ti. Ahme 39 ah hi ti hin a peh than, “ ka pa nih a ka pekmi cu ahohmanh an tlau lai lo” a ti. A hme 44 ah Ka pa nih a ka pek lo mi paoh cu a hohmanh ka sin an phan kho lai lo tiah a ti. Hi bia vialte hi minung lei ruahnak in cun a remrel lo ngai mi a lo zeicatiah kan Pathian hi thleidannak a ngeimi Pathian asi ti sual a fawi te.

Nain Rom.9:10-18 ah kan hmuh rih mi cu Pathian nih khamhnak kong ah thim hlei mi a ngeih ahcun kan Pathian hi a ding lo kan ti kho lai maw? Ti kho naisai hlah e, kan I zuamnak ruangah si lo in a velngeihnak in a kan thimtu Pathian thawng lawnglawng in khamhnak kan co khawh hi cathiang nih hin fiang tein a kan chimh. Cucu a hohmanh kan I porhlawt hnga lo nak dingah asi.

Jacob ka dawt I Esau ka huat a ti tikah an nu paw chungah an rak sem hlan ah a si cucu minung I zuamnak le duhthimnak ruang ah siloin zangfahnak a ngeitu Pathian duh ning le khuakhan cia ning lawnglawng in a si ti kha a langhter.

Minung nih fa kan hrin ning le Pathian nih hrinthannak a kan pek ning hi tahchunh awk a tha ngai. Taksa in hrin kan sinak kongah hrin a simi fanu le fapa hna duhthimnak pakhat te hmanh aa tel lo. A kan hringtu nu le pa duhnak siloah I tonnak in hrin kan si ko. Thlarau lei I hrin na sinak zongah hin nangmah duhnak pakhat te hmanh aa tel lo.

Biahal awk um rihmi cu zumhnak kan ti mi hi tah minung rian a si lo maw,kan zumh a hau lo maw ti hi a si. A si, zumh cu a hau a sinain zumhnak zong cu Pathian nih an pek lo ahcun na zum kho hlei lai lo tihi bia lehnak cu a si.

A si kun ahcun thawngtha kan chim len mi le phaisa tampi dih in missionary kan thlahmi hna hi pokpalawng maw a si kun ne lai? Si hlah e, Rom. 10:10-17 ah thawngtha chimtu hna nih thawngtha an chimnak thawng in Pathian thimmi hna nih khamhnak an co ding hi Pathian khuakhan cia mi chung ah aa tel cia dih mi asi.

A donghnak ah, hi tluk dawtnak sang in a kan dawtu kanmah tuah sernak pakhat te hmanh tel lo in a sunglawi tuk mi thlarau zungzal nunnak a lak tein a kan petu Pathian hi lawm zungzal ko hna usih law thangthat zungzal ko hna usih….