Laithil le Lasi Kong ah aa thupmi Biathli

Tulio ah social media ah hun ceih pah mi, Lai thil thawhkehnak kongah kei zong Baibal he vun zohti tak ka duh ve. Baibal hi cu a rak tling tuk hringhran ko rua, minung nih kan ruah cangmi, kan ruah lio mi le kan ruah te lai mi zong Baibal chungah hin tlamtling tein an rak um dih cang ko kan hmuh khawh le hmuh khawh lo lawng khi a rak si ko.

Lai thil thawhkehnak cu tuanbia a thei mi hna nih akan chimh tikah Lasi sin in lakmi a si. Ahohmanh nih tuanbia cu a si lai lo tiah chim awk atha lo zeicatiah tuanbia cu thil a rak cangmi kong a si tikah kan duh phun a si zongah a si ko I, kan duh lo phun le kan cohlan khawh lo phun a si zong ah al awk a tha lo! na thleng kho hlei lai lo ti cu a fiang mi a si.

Lasi kan ti mi cu Khuachia nih min a ngeihmi tampi lakah laimi nih kan auh ning phun khat a si. Chim duh mi cu Lasi an ti mi cu phundang in kan chim ah cun khuachia tiah chim khawh a si. A si ahcun khuachia cu mi zeidah a si I zeitindah aa thawhkeh ti hi zoh tti hna usih. Isaiah 14:3 in a tang lei le Ezekial 28:11 in a tang lei ah na rel ahcun khuachia ti mi hi hodah a si I zeitindah aa thawhkeh ning a si kha fiang tein na hmuh lai.

Khuachia cu van mi chung in an sual ruangah Pathian nih Vawlei ah a tlakmi hna an si. Pathian nih a mah thangthattu ding ah dawh taktak in a ser I lungvar phunkip le aa dawh taktak mi thil phun kip in a thuam I a min ah Lusifer tiah auh a rak si. Aa dawh tuk caah a mah a tamh tu Pathian kha a doh ciammam I vancung ah raldohnak ngan pi a chuak I Lucifer le a party pawl cu an sung I vawlei ah thlak an si I khuachia tiah kan auh hna, cheukhat nih satan ti zongah kan auh hna I a cheu nih Lasi ti zong in kan ti hna, a tlangpi in cun khuachia ti kha a si ko.

Cucaah nihin ah kan Laithil hi a thawhkehnak hram taktak vun zon ah cun Lasi sin in si lo in Lasi a sertu kan Pathian nih Lucifer tamhnak si lo ah thilthuam phunkhat ah arak ser mi a si I Laimi sin ah Lasi hmang in Pathian nih a kan pekmi a si tiah ka hmuh ning a si. Cucaah kan thil thuam hi Pathian pekmi a si tiah upat hna usihlaw Pathian sunpar nak ca tu ah hmang hna usih. Kan Laimi a kan cawisangtu ah hmang hna usih. Chungkhar tampi nih pawcawmnak caah an hman bantuk in hmailei zongah hmang chinchin rih ko hna usih. Amah belte Pathian nih pek mi aa dawh tuk mi kan thuam hi porhlawtnak ah kan hman ah cun, Lucifer bantuk in a kan sertu Pathian he a kan then tu zong a si sual ko lai. A kan cawisangtu a si bantuk in cawisang ve ko hna usih, a kan dawhter tu a si bantuk in dawhcah tein hmang ve ko hna usih. Kan nun phung ah sullam ngei a si bantuk in sullam ngei te in hmang ko hna usih.

Baibal ca ka ttial mi hi tha tein rak rel law cuai rak thlai ve tuah zeitindah na hmuh ning si ve. Catialtu nih Laithil a thawhkeh ning a hmuh ning a si.

Original Authur : Pastor Dawt Chum Ling (Cinkhua)