Lukewarm: “A Kik Lo A Lum Lo” Mi Loadisia Khrihfabu Background

Biahmaitthi ( Biathlam 3:14-22 ) the Lukewarm church 

Laodicea Khrihfabu hi Biathlam cauk chung i zultu Johan hmang in Jesuh khrih nih khrihfabu pasarih sin ca a rak kuat mi lak ah pakhat a si ve. Laodisia khua sin cakuat kan rel tikah a dang Khrihfabu 6 sin cakuat he aa lo hrimhrim lo, Loadisia Khrihfabu hi thangṭhatnak voikhat te hmanh a hmu bak lo—fakpi in chimhhrinnak le kik lo lum lo (lukewarm) khrihfabu nan si tiah a siknak lawng hmuh khawh asi.

Hi khrihfabu hi voikhat te hmanh tthangthatnak a ton ve lonak a ruang tling tein kan hngalh khawhnak ding caah, Loadisia khuapi le Khrihfabu tuanbia le an nunphung kong kha kan hlathlai a hau. Jesuh khrih nih khrihfabu a chimhrin tikah an mah khua nunphung le an sining zohchun cio in a rak chimhhrin hna, cu ve bantuk in Loadisia khrihfabu zong hi an mah dirhmun te le an sining te kha lak in a rak cawnpiak ve hna. A tanglei ah a tawinak tein Loadisea khuapi background le nunphung kan rak zoh hna lai.

1. Khuapi Rumnak le Zalonnak

Laodisia khua cu Asia Minor ah a um mi asi, chawlehnak lam a biapi tuk mi pathum aa tonnak nelrawn laifang piah a rak um mi asi. Cu kaa pengtlang chung i a rum bikmi khuapi pakhat a si, tangkaa lei le chawlehnak thazaang ruangah minthang taktak a si.

AD 60 ah lihninh nih khuapi cu faktuk in a den i Loadisea khuapi hi cei taktak in a rak rawk, asinain cu lio ah cun Laodicea nih Roman Empire sin in phaisa bawmhnak a rak cohlang duh lo, bomh ka hau lo tiah a rak ti i, a mah ram chung chuak thliri le tangkaa hmang in khuapi cu a dihlak in a rak remh dih tthan, hi kong ah hin Roman cozah zong an khuaruah a rak har ter hna ti asi, cu tluk cun a mah le mah aa zum i ka rum tuk ko a hohmanh bomh ka herh lo ti lungput a rak ngei ve mi khuapi a si, an rumnak cu i uahnak le i porhlawtnak ah an rak hman i cu lungput cu zumtu nih khrihfabu zong ah an rak i luhpi ve caah a donghnak ah cun thlarau lei derthawmnak ah aa chuah. (Biathlam 3:17)

 2. Thilpuan sernak le sii lei thanchonak

Laodicea a rumtuknak a ruang hi tangkaa a luan bak in a luannak

phunhnih an rak tuah, cu hna cu tuhmul in ser mi puan le sii lei thiamnak hna an si. Loadisea nih an ram chung chuak a tleu taktak mi tuuhmul sen a chuah i cu cu ram kip ah heh tiah export an rak tuah. Cu lawng si loin, Laodicea ah cun vawlei cung minthang a si mi sii lei sianginn tha taktak pakhat a rak um i, cu nih cun “Phrygian powder” tiah theihmi mit si an ser, cu nih cun mit zawtnak phunphun a damter.

Hi an rianttuannak nih hin Loadisea khuapi minthannak le rumnak a rak chuahpi chin. Sihmanhsehlaw, Biathlam ah, Jesuh nih hi kong ah hin a mawhchiat hna mit si ser thiam an si tiah nan min cu a thang ko nain “micaw nan si” cun a rumtuk le a ngeituk ah nan i ruat ko nain zeihmanh nan ngei lo “taklawng” in nan um tiah a rak ti hna.

 Biathlam 3:17,Zei caah tiah, ‘Ka rum, ka ngei cang i herhbaumi zeihmanh ka ngei lo,’ tiah naa ti, sihmanhsehlaw nang cu mirethei, zaangfahawktlak, misifak, mitcaw le taklawng i na um hmanh kha naa hngal lo.

taksa in an ngeih tiah an ruahmi cu an thlarau mit a cawt tertu le taklawng in a umtertu hna ah an cang.

3.Loadisea Khua Cu Ti An Har

Loadisea khua hi zeidang ah cun an rum tuk ko nain an panwgkam ah ti nung a um lo caah dinti an rak har tuk, an khua in meng 7 in 10 tluk a hlahnak ah ti an rak lak, hlan lio cu tuchan kan hman mi pipe bantuk a rak um rih lo caah lung nganngan kha an rak vih hna i an peh hna, cuti cun ti an rak lak, an ti hna a hlah tuk caah an khua a phak ah cun a kik lo a lum lo (lukewarm) tithaw lo taktak ah aa chuah tiah tuanbia ah hmuh khawh asi. Cucaah Jesuh nih “na kih ahcun kik lawlaw, na lum ah cun lum lawlaw” (do not be lukewarm) a ti tikah Loadisea khua mi caah cun ruah len hau lo in fiang tuk in an rak theihthiam khawh.

 

Biathlam 3:15 “Na rianṭuannak ka hngalh, nang cu kik lo sa lo na si. Rak kik asiloah rak sa lawlaw law ti cu na ca ah kan duhpiak. 16 Cucaah na lumphutphat i kik lo sa lo na si caah ka kaa chung in kan chak lai.

Biadonghnak

Loadisea khuapi cu vawlei lei tahfung in cun a rumtuk mi tangkaa lei zong hohmanh bomh hau lo in khua a sa kho mi khuapi a si lanwg si loin si le ai lei zong ah a hohmanh bochan hau lo in a mah tein aa zoh kho mi a rak si nain cu a dirhmun nih cun thlarau lei ah a tlak ter i Pathian lung a tong lo mi khua ah aa rak chuah ai.

Loadisea sin cakuat nih vawlei lei hlawhtlinnak cu a hman thiam lo ahcun thlarau lei sifahnak a kan phorhtu thil tha lo taktak ah aa chuah kho ti a kan cawnpiak. Kan rumnak kan minthannak le kan thil ti khawhnak vialte hi kan i porhlawtpi i kan i uah pi ah cun Loadisea khrihfabu bantuk in Jesuh caah mitcaw le taklanwg in a vak mi le a kik lo a lum lo (lukewarm) menmen kan si ko lai, porhlawtnak lungput he khrih ton khawh a si lo zia fiang tein Loadisea khrihfabu tuanbia nih a kan cawnpiak mi a si.