Mathai 24 Fianternak: A Hodah lak mi an si, a hodah tantak mi an si

A Hodah lak mi an si, a hodah tantak mi an si

====

Matthai 24:36-41 hi cawnpiaktu tampi nih thianglor kong cawnpiaknak ah an hman tawn, a hlei tein 40v i “lo rianttuan mi pahnih lak ah pakhat lak a si lai” 41v “fang rial mi nu pahnih lak ah pakhat lak a si lai” a ti mi hi zaran nih cun thianglor kong ah kan ruah i, lak mi hi mithiang an si lai i tantak mi hi misual kum 7 harnak chung lut ding an si lai ti te in ruah tawn asi. Cucaah lak mi chung ah i i tel lai lo ding hi khrihfa tampi nih a ttih in kan ttih mi a si. Asinain a context a hme 36 in 41 tiang tha tein rel tik ah a lettalam tuin a rak si ai. Lak mi hi misual biaceihnak a ing ding mi an si i tantak mi hi Khrih penak chung ah a lut ding mi rak si dawh an si, cucu a tang lei ah kan rak fian ter hmanh lai.

A context

Matthai 24:26-41 hi Jesuh rattthannak (secound coming) kong aa ttialnak a si, zapi kan lung aa tuai lengmang mi cu “Thianglor le Jesuh rattthanak” hi a si. Mi tampi nih aa khat ah kan ruah tawn, a biapi tuk mi cu mah pahnih hi an i khat hrimhrim lo ti theih fian hi a si, Jesuh a voihnihnak a rat tthan hlan ah mithiang lor a si lai, cucu zeitindah kan theih khawh ti ah cun Thianglor cu “Tufa nupi tthit puai” he aa pehlai mi asi, Jesuh nih a tthit ding mi a monu (church) don ding ah minmei cung tiang a rak ttum lai, mah hi thianglor kan ti mi cu a si lai (1 Thesalon 4:17). Asinain vawlei a phak lai lo caah Jesuh ratthannak kan ti lengmang mi kha a si rih lo, zeicatiah Jesuh Ratthannak cu Baibal nih a kan chimh bantuk tein minmei cung tiang lawng si lo in a kee hrimhrim nih Olive tlang kha a lamh lai ti asi (Zecha 14:4). Jesuh a voihnihnak a ra tthan lai kan tinak a ruang cu a voikhatnak a rak rat bantuk tein a pum hrimhrim kha vawlei ah a um lai tinak khi asi, Thianglor ah cun vawlei a phak lai lo caah Jesuh rattthannak tiah minbunh cop khawh asi lo. Mathai 24 hi thianglor kong he aa pehtlai mi si lo in Jesuh ratthannak kong he aa pehtlai mi asi ti cu fiang tein a hme 37 ah hmuh khawh asi. Jesuh ratthannak le Thianglor an i dannak fiang tein na thleidan khawh ah cun mi tampi nih an buaipi tawn mi “aho dah lak mi an si i a hodah tantak mi an si (40&41)” ti luklak kong ah na buai hrimhrim ti lai lo a context fian ah cun hrialfiah hau lo tein na fiang ko lai. A tanglei ah kan rak zoh hna hmanh lai.

Lak mi le tantak mi

Lak mi cu mizei bantuk dah an si lai i laklo mi teh zei bantuk dah an si lai ti hi mitampi nih kan i theih fian tawn lo mi cu asi. Hi kong he petlai in a hme 37 in 39 tiang ah Jesuh nih tahchunnak i a lak mi Noah Buanchokcho tuanbia nih fiang taktak in a langhter. Baibal rak rel chih (Mathai 24 :37, Mi Fapa rat lainak cu Noah chan bantuk khan a si lai. 38 Zei caah tiah buanchukcho a tlun hlan, Noah lawng chung i a luh ni tiang an ei an ding, an i ṭhi-um i an i ham, 39, buanchukcho a tlun i a lak dih hna hlantiang zeihmanh an hngal lo. Cu bantuk cun Mi Fapa a rat lainak cu a si ve te lai). Pakhatnak# Noah buanchukcho lio banntuk a si lai a ti, pahnihnak# a tanglei a hme 39 ah misual pawl kha ti nih a lak dih hna hlan tiang zeihmanh an hngal lo a ti tthan. Al awk tha lo in a fiang mi cu lak mi minung pawl kha Noah bia a ngai duh lo mi misual pawl an si i Pathian nih an sualman tilian hmang in dan a tat hna biadang in chim ah cun bia a ceih hna, cun Noah le a chungkhar pawl kha ti nih a lak hna lo mi Pathian nawl a ngai i a him mi Pathian Biaceihnak in a luat mi an si ti kha a si. Asi ah cun nangteh lak mi si maw naa thim lai tantak mi si dah??

Biadonghnak

Vawlei cung cawnpiaktu tampi nih hi Baibal cacang hi thianglor kong chimnak ah an hman tawn mi a si, cun laimi cawnpiaktu cheukhat zong nih an chim ttheu tawn, Lai hla zong ah “sumsu mi Pahnih lak ah pakhat khualtlawng mi pahnih lak ah pakhat” ti mi kan ngeih i cu hla cu hi baibal cacang chirchan in phuah mi a si theu lai tiah ka ruah. Asinain baibal a context le a biafang hman ning tete tha tein kan hlethlai tikah lak mi sinak in laklo mi si hi rak tthat deuh dawh a si hui ai. Lak mi cu Pathian nih an sual man bia a ceih hna lai i lak lo mi cu Jesuh Khrih pennak chung ah nuam tein an um lai ti kha Baibal cawnpiak mi si deuh dawh asi.