Khrihfabu Nih Sabath Hi Kan Ulh Ve Awk Asi Maw?

Israel mi caah cun Sabbath ulh lo hi sualnak ngan tuk ah rak ruah asi, sabbath phung a buar mipoh cu thih dan an rak pek hna,

Ex 31: 14 Cucaah cun dinhnak ni cu nan ca i nizarh ah ser a si cang caah, nan ulh hrimhrim awk a si. A ul lomi cu thah a si hrimhrim lai. Dinh ni i rian a ṭuanmi paoh cu a phun hawi sinin thlei a si hrimhrim lai.

Jesuh vailam cung i thah a rak sinak a ruang tampi lak ah pakhat a si ve mi cu, Sabbath ni zeiah a rel lo, sabbath ni a buar ti hi asi, a cung Baibal ah kan langhter bantuk in Judah phung ah cun Sabbath ni a buar mi cu phung ning tein thah khawh an rak si taktak ko, cu ruang fawm ah cun Jesuh zong cu Sabbath zulh phung a buar caah kan phung ning in thah ding aa tlak ko tiah pharasee pawl nih an rak tinak kha asi.

Biakam hlun kan rel tik ah Israel miphun hi a tu le a tu ti awk in ramdang (zumlotu) sal ah an rak tang zungzal, Pathian nawl an ngeih lo deuh poh ah ramdang kut ah Pathian nih a rak pek tawn hna, Sabbath an buar ruang zongah sal an rak tang tiah Cathiang aj akn hmuh. (Jer 17:27). Sabbath ni hi an Miphun ning in an buar ahcun miphun ning in salah a rak kuat hna i pumpak nih an buar ahcun lung in thilak rak cheh an si. Sabbath ulh hi Israel mi caah cun nawlbia a rak si caah duh zong duh lo zong ah rak ulh cio a si.

Sabbath Cu Khrihfabu He Pehtlaihnak A Ngei Lo

Biakam hlun chan lio ah cutluk a rak biapi mi Sabbath ni cu biakamthar ah zumtu nangmah le kei mah nih kan ulh ve a herh maw? Ti hi kan i al tawn cio mi cu a si. A mak tuk mi cu biakamthar (khrihfabu) sinah zultu zong nih sabbath ulh ding in an forhfialnak cacang hmuh awk a um lo. Biakam hlun prophets zong nih Gental mi nih sabbath ulh an hoh te lainak muithlam an rak chim chung bal lo. Sabath cu Khrih a rat hnu in a mah duh piin a tlau i Baibal nih biapi tuk ah a hunchia ti lo mi ko khi a lo. A tang lei ah biakamthar cauk ah sabbath kong a langh ning kan rak zoh hna lai.

Paul Nih Sabbath Kong Ah Zei Dah Achim

Kolosa 2:16-17, 16 Cucaah cun ahohmanh nih nan ei nan dinmi thil kong ah siseh, ni thiang le Thla Thar Puai le Sabbath kong ah siseh, phung in serpiak hna hlah seh. d 17 Kha bantuk thil hna kha cu hmailei thil a ra lai ding an muithlam men an rak si, a taktak cu Khrih hi a si.

 Judah phunglam hna hi Khrihfa kan si hnu zong ah kan zulh awk an si rih ko, khamhnak cu zumhnak lawng in a za lo, sabbath zong kan ulh a hau, ei le din zong kan i sum a hau tiah a hman ngai bantuk in Khrihfabu hlen an rak timh hna lio ah Paul nih cakuat a rak ttial mi a si. Judah biaknak nih a ngeih mi zulhphung pawl le khrihfabu cu pehtlaihnak a ngei lo tiah Fiang taktak in a hun chim. Zei ruang ah dah kan zulh an herh ti lo ti ah cun kha hna pawl kha cu a thlam an rak si i Khrih hi a tak cu a si e a ti. A tak a chuah cang caah a thlam cu a hau ti lo ti khi a si ko.

Zeitin Dah Sabbath Cu Khrih Ah Atlin Ning Asi

Hebrew cakuat hi Zei zong vialte nak in Jesuh a ngan deuhnak kong tialnak cauk a si, tahchunnak ah Biakam hlun ah cun tlangbawi nih kumkhat voikhat tukawng in rai an rak thawi, Asinain Jesuh nih cun tukawng si loin a mah thisen i put in voikhat ah zalak in rai a thawi, cucaah tlangbawi  raithawinak kha kan herh ti lo a ti. Cu bantuk cun Hebrew 4 chung na rel ah cun Moses nawlbia nih a rak pek hna mi Sabbath dinhnak nak in Jesuh nih a kan pek mi dinhnak hi a ngan deuh, a tha deuh a tinak na hmuh lai. Judah phung nih cun ni 7 chungah nikhat dinhnak caan a rak pek hna, asinain Khrih nih cun zeitik hmanh ah a dong kho ti lo mi dinhnak kha a kan phorh cang. Hebrew 4:4, cu dinhnak cu Moses nawlbia zulhnak thanwg in kan hmuh mi dinhnak men a si lo, Khrih kan zumhnak thawng in kan co mi dinhnak a si tiah a ti. Sabbath dinhnak nak in a tha deuh mi dinhnak cu Jesuh nih a kan pek cang caah kan nih zumtu caah cun sabbath dinhnak hi a herh ti lo kantinak cu asi.

Zei Ruang Ah Dah Sabbath Ulh Kan Hoh Lo

1nak, Biakam hlun ah cutluk in a rak biapi mi sabbath ni cu Biakam tthar ah voikhat hmanh sabbath ulh forhfialnak kong a lang lo.

2nak, Nawlbia 10 chung ah a dang 9 hi biakam thar Khrihfabu sinah tuahding in chim nolh lengmang an si nain sabbath nan ulh lai ti hi voikhat hmanh a nolh lo.

3nak, Khrih a thih hnu ah biakam thar zumtu pawl hi sabbath ni (niruk) ni ah an i pum bal lo. An Pathian thangthat ni hi niruk ni si lo in thawhthan ni, zarh hmasabik (sunday) tu ah a rak si.

Next ah “Sunday pumh hi Baibal ah a um maw?” ti tlangtar in ka rak ttial te lai rak rel than te.