I Țhen Hnu Ah Nupi/Pasal Ngeih Țhan Hi Baibal Nih A Onh Maw?

Nupi/pasal ngeih hnu ah i then than i va dang ngeih hi a tu kan chan ahcun a phung bantuk ah ruah a si cang. I țhen tiang hi cu a fawi rih ko nain i tthen hnu ah va ngeih loin um beh hi mi tamdeuh caah cun a har tuk mi a si caah va ngeih tthan lengmang cio asi. Khrihfa kan si bantuk in kan puai lio ah cun baibal chung ah Pathian nih chungkhar kong a kan cawnpiak mi ning tein le, i țhen ti lo ding in bia zong i kam i chungkhar dirh cio a si, asinain țhen kan duh bal ah cun a hohmanh nih baibal cawnpiak mi a si maw si lo ti zong tuaktan a um hlei ti lo. Hi kong he pehtlai in hlan chan khtihfabu hruaitu nih cun biatak tein an rak au pi, tahchunnak ah Augustine (church father) nih i țhen hnu ah va ngeih tthan cu sual bak a si a rak ti. Asiahcun a tu kan chan ah a lar bak mi i țhen hnu i Nupi/pasal ngeih tthannak kong he pehtlai in baibal nih fiang tein a kan cawnpiak mi a um maw? (scripture divorce and Remarriage). A dot dot tete in A tanglei ah kan zoh hna hmanh lai.

Baibal nih țhennak hi a onh maw?

A onh ko ti khawh asi a mah bal te Baibal nih ri a khiah, aa țhiumm cang mi nuva cu a tang lei langhter mi pahnih ruang ah i țhen khawh a si.

1) Zumhawk tlak lo sinak ruang ah (Mathai 5:32 Sihmanhsehlaw kei nih cun nupa sualnak ruang ah dah ti lo in aho hmanh a nupi kha a mak ahcun, a nupi kha ṭaangdang a pomter i, aho hmanh makmi nu kha a ṭhimi zong ṭaangdangpom sualnak a tuah a si tiah kan ti hna.). Matthai 5 chung ah fiang tein kan hmuh bantuk in nu maw pa nih zumhtlak loin a um tidah lo ahcun tthen hi baibal nih a onh lo, i sik luklak ruang sawhsawh ah i țhen cu Baibal nih sual a phawt mi asi.

2) 1Kotin 7:15 (Sihmanhsehlaw zumlotu a va nih kaltak a duh ahcun kaltak ko seh. Cu bantuk ah cun, unaupa le unaunu hna cu kham an si lo. Zeitin tiah Pathian nih kannih cu daite in um awk ah a kan auh). 

Zumtu a si lo mi Pasal nih zumtu a si mi a nupi kha a kal tak ah cun kal tak ko seh, cu bantuk ah cun nu cu a sual lo a thiang ko ti asi.

Țhennak cu Pathian tinh piak mi a si lo nain țhen lo awk a ttha bak lo mi dirhmun  pahnih baibal nih a kan chimh cu pahnih cu a cung lei ah kan rak langhter cang mi hna hi an si, hi pahnih leng in cun zeibantuk dirhmun ruang hmanh ah baibal nih chungkhar țhen a kan onh lo ti khawh asi. I țhen tiang khi cu aa rel deuh rih țhen hnu nupi/pasal ngrih țhannak kong hi a hnok taktak mi asi.(Scripture on Divorce and Remarriage).

 A si ah cun i țhen hnu ah nupi/pasal ngeihthan kong ah Bible nih zeizah a chim? (Let’s see scripture on divorce and Remarriage)

(Matthai 5:32) A pasal nih a tthen hnu ah nu nih va dang a ngeih ahcun a tthentu a pasal nih a nupi cu ttangdang a pomter a si cucaah an nih cu a sual, cun a pasal he aa țhen mi nu kha pa pakhat nih a tthit ahcun a rak țhi tupa zong a sual ve. Asinain a cung lei ah kan langhter cang mi Baibal nih a onh mi tthennak pahnih ning tein aa tthen mi caah cun va an ngeih than zong ah an thiang ko tinak a si hnga.

Micheu nih cun a va a thih hnu lawng ah va dang a ngeih awk a si an ti ve, (Roman 7:2-3 Cucaah, va a ngeimi nu cu a nun chung paoh phungbia nih cun a va he a hren. Sihmanhsehlaw a va a thih ahcun a va he aa pehtlaihnak phungbia khan a luat. 3 Cu bantuk ṭhiamṭhiam in a va a nun ko lio i pa dang a vat ahcun ṭaangdangpom nu tiah mi nih an ti lai. Sihmanhsehlaw a va a thih ahcun cu phungbia cun a luat i pa dang a vat hmanh ah ṭaangdangpom a si ti lo.) An i tthen zong ah a va a thih hlan lo cu vadang ngei bak hlah seh ti a si.

Azei a si zong ah ruang ngei huaha lo (zumhtlak lo ruang or zum lotu pasal nih a kal tak mi dah ti lo) in aa țhen mi nu nih va dang a ngeih țhan ahcun cucu baibal nih sual a phawt mi tthitumnak, a thiang bak lo mi tthitummnak a si tiah fiang tein a langhter ko (it is clearly a sinful act according to the standpoint of scripture on divorce and Remarriage). Pathian mit ahcun a va a thih hlan ah va a ngei mi nu cu misual a si i a rak tthi tu pa zong misual a si ti khi baibal chim mi nih cun a hoih deuh mi a lo.

Biadonghnak

Nu le pa cu Pathian nih aa țhi umm ding, chungkhar dirh ți ding ah ser mi kan si ko nain voikhat dirh cang mi chungkhar hrawh tthan lengmang hi Pathian tinh mi a si lo, voikhat dirh mi nih hin nun chung ca zaseh ti hi Pathian tinh piak mi cu a si. Kan i țhit umh tikah Baibal ning tein kan tuah bantuk in kan donghnak zong baibal ning tein dongh ter khawh i zuam hna usih.

Biakilh: ttial awk a sau deuh caah Nu lanwg ka langhter deuh asinain Pa zong kan i tel ve, cun Sual a si ka ti tikah hell tlaknak a si ka tinak a si lo, Pathian mithmuh ah zeitluk sual a si cu ka thei ve lo, asinain a biapi tuk mi cu zei tluk in misual si ko hmamh usih law Pathian sin ah lungtak tein ngeihthiam kan hal ah cun a kan ngaithiam khawh dih ko.