Sunday Theng i Pumh Hi Baibal Ah A Um Maw?

Cheukhat zumtu nih cun zarhkhat chungah nikhat hi Pathian thangthatnak ah kan hman awk a si Sunday theng a si lo zongah a poinak a um lo tiah an ti tawn. Cucu na zumh ning a si maw, biakinn pumh caan hi ninga ni hrawng ah khin hei sisehlaw a poi ah na chia lai maw? Zumtu nih sunday theng te kan Pathian tthangthat ni ah kan hman mi hi a ruang fiang tein na thei maw? Khrihfa mi nih Sunday theng te Pathian thangthat ni ah kan hmannak a ruang kan rak fianter lai. Kan hnu lei ah Sabbath cu Khrihfabu nih kan ulh a herh lonak kong le zumtu he pehtlaihnak a ngeih ti loning kan rak ttial cang. Relnak link…. Khrihfabu Nih Sabath Hi Kan Ulh Ve Awk Asi Maw?a tu cu Sunday kan i pumhnak a ruang kan rak tial ve cang lai. Note: First day of the week a ti mi cu Sunday tiah a tawinak in kan rak ttial lai.

Sunday worship hmasabik

Judah mi caah cun ni (day) hi an i khat hna lo, ni cheukhat cu an upat khun hna i acheu cu zei ah khin an rel hna lo. Sunday hi Judah biaknak ah upat mi a si bal lo, ni sawhsawh te khi a rak si ko. Sunday (ni hma sabik) special day i a hun i caan nak hi Mathai 28 hnu in a si. Cu ni cu Jesuh Khrih a thawhthan ni kha asi(Mathai 28:1-8). A hme 9nak te na rel ah cun nu pawl nih Jesuh an biaknak kong kha na hmuh lai, hi hi thangthatnak fa te a lo nain Lamkaltu chan Khrihfabu thok in nihin khrihfabu tiang nih an keneh kan zulh zungzal mi Sunday worship aa thoknak hrampi a si.

Mathai 28: 9 Cun a zultu hna va chimh awk i an va kal tikah, zohhmanh, Jesuh nih a ton hna i, I lawm ko u! a ti hna. Cun an hei fuh i, a ke kha an i tlaih i an biak. 10 Cutikah Jesuh nih annih cu, <<Ṭih hlah u, va kal u law ka unau hna kha Galilee i kal awk ah va chim hna u, cuka ah cun an ka hmuh lai,>> tiah a ti hna). 

Sunday ah Jesuh Thawngtha a chim

Luke 24 chung ah hin Jesuh Khrih a thawh ni (Sunday) tthiamtthiam ah Jerusalem in meng 7 a hlatnak Emmuas khua lei panh in zultu 2 an kal pah i Jesuh Khrih thihnak le thawhtthannak kong khuaruahhar taktak in an i ceih lio ah Jesuh zong an sin i a rak chuah venak kong kha kan hmuh. Luka 24  hi  Jesuh nih Sunday ah Thawngtha biatak tein a chim a voikhatnak a si(thawhthan hnu ah). Luka 24:27, Cun Moses ṭialmi thawk in prophet vialte nih an rak ṭialmi Cathiang vialte chung ah amah kong kha annih cu a hrilhfiah hna. Baibal thiamsang pawl nih expository sermon hi Jesuh nih a thok mi a si e an ti. Cucu Jesuh nih Sunday ni ah zultu pahnih sin i a rak chim mi kha asi. A tang deuh ah Jesuh nih thawngtha bia a chimh mi hna zultu 2 cu a ran khawh chung in Jesusalem i an va kirnak kong kha a ttial. Jerusalem an va phak bak ah zultu pawl hmunkhat te i an i pumh kha an va hmuh hna e a ti. Luka 24:33) Jesuh a thawh ni nikhat chung ah hin zumtu pawl an i pumhnak voi tampi hmuh khawh a si. Cu ni thok cun Sunday hi zumtu pumhnak ni ah rak hman beh a si.

Thiang Thlarau kha sunday ah a rak ttum

Lamkaltu 2 chung ah Pentecost ni i Thiang Thlarau a ttumnak kong le khuaruahhar taktak in Khrihfabu hrin a rak sinak kong kan hmuh, Pentecost ni hi Khrihfabu chuahni (birthday) ti zong ah ti khawh asi. Pentecost hi Judah mi nih kum fatin an ngeih mi thlaithar puai a si. Penta cu five tinak a si, a sullam cu hi puai hi sabbath hnu ni 50nak ah tuah mi puai a si tinak khi. Asi. Sabbath ni cu ni 7nak ni ah va si kaw. Ni 7 voi 7 kan fonh ahcun ni 49 a chuak, 7×7=49 a ni 49nak hi sabbath ni a sinak a si, pentecost ni cu sabbath ni in ni 50nak ah tuah mi a si caah sabbath thaizing Sunday (firstday of the week) kha a ciah. Zei ruangah dah hi vialte hi kan chim ti ah cun, Thiang Thlarau a rak ttum ni hi Sunday ni bak a si i Khrihfabu zong hi sunday ni ah hrin a rak si ti kha fiang tein langhter kan duh caah a si. Cu ni tthiamthiam ah cun Peter cu a dir i biakam hlun ah prophets nih an rak chim mi Cathiang kha pakhat hnu pakhat in a hrilhfiah hnanak kong zong kan hmuh than.

A cung lei ah kan langhter cang bantuk in Sunday ni hi Jesuh a rak thawh ni a si lawng hmanh si lo in zumtu hmunkhat ah an i pumh tawnnak ni le Cathiang an rak hrilhfiah i an i cawnpiak tawnnak hi a si ti hi baibal ah al awk tha lo in a fiang mi si. Cu lanwg si lo in Sunday hi Thiang Thlarau a ttum ni a si fawn, cun Sunday hi Khrihfabu chuahni a si rih hui. Cu thil vialte a can hnu in Biakam thar zumtu pawl nih Sunday hi an i pumh ni ah an rak hman i hmunkhat te i Pathian thangthat ni ah an hman behnak a si. Nihin zumtu nih Sunday theng te kan Pathian thangthat ni ah kan hman mi hi Baibal chan lio ah zultu hrimhrim nih an rak hman ve mi ni sunglawi a si.