Thlarau Baptisma Sullam Fianternak

Thlarau Baptisma Sullam

Kan Bible chung ah hin Baptisma kong he a pehtlaimi biafang hi voi 90 leng a um tiah Bible lei hlathlaitu nih an chim. Kan Lai Bible Thiang ahcun Ti in Baptisma kan in mi zong khi Tipilin tiah a chim I Thlarau Baptisma zong khi Tipilin tiah a chim. “Tipil” tiah a ti dih I zeiruang ahdah “Ti” hi a telh dih hnga ti hi cu ka thei ve lo nain a ruang cu um ve theu lai tiah ka ruah. Baptisma ti zong hi Laiholh bantuk in kan I fianmi a si pah cio ko caah Baptisma te le tipilin ti cu cawhhrup in hmang ko hna usihlaw.

Ti in Tipil kan in cu Pathian nih a riantuantu ah ah chiti a thuhmi hna kan pastor te a siloah pastor ngei lo mi cu deacon te, ti bantuk zong nih a kan pek tawn. Hi zawn ahhin mi cheukhat cu pastor um lo ahcun Tipil in lo lawlaw kha a tha deuh tiah a ruatmi an um ve. A poi ngai mi cu Reverend thengtheng pek kan duh mi hi a si rih, mah te hi missionary cheukhat nih an ton ngaimi harnak pakhat ah a cang ve, missionary tam deuh cu Reverend pek rih lo mi an si hna I thawngtha an chimh hna I Khrihfa ah a lutmi hna le tipil in a duhmi hna khi Reverend um lo ruangah a kumkum in an hngah ter tawn hna I Khrihfa lungthleng thar caah cun a poi ngai tawn tiah mi cheukhat kaa in ka theih tawn.

A taktak ah cun mah hi kong hi bible nih a kan cawnpiakmi si lo in Khrihfabu nih phung le phai kan I suai sawhsawhmi khi a hei si ko. Etheopia tildit pa, tipil a petu kha deacon(khrihfaupa) a si. Jesuh nih Tipil a pek hna ti zong hi bible chungah voitampi kan hmuh nain (John 4:1-2) ah kan rel ahcun kan hmuh khawh mi cu amah Jesuh nih cun a pe bal hna lo I a zultu pawl kha a pek ter tawn hna tiah a chim. Baptisma a kan petu le a hmun le a can kong ahcun buai ding a si hrimhrim lo, cu nak in cun kaa hrinthan ruang ah maw tipil ka in, a silo ah ka kum a tling ve cang ko ti le nupi thit, va ngeih duh I Tipil in lo ngaingai cu tha lai lo tiah a phung men in a ing mi dah ka si ti tu hi biatak tein ruah awk a tlakmi a si.

Taksa in Tipil kan in hlan ah hin Thlarau in Baptisma tihi kan co hmasa hrimhrim ding a si. Thlarau Baptisma co lo pi in taksa in Tipil kan in ahcun kan I palh ngaingai ti nak a si lai. Taksa in Tipil kan in cu Pathian riantuantu hna nih Ti in Tipil a kan pek cucu Hmuhkhawh a si lo mi thlarau Baptisma kan co hmelchunhnak, Jesuh Khrih a thihnak ah ka thi I an vuinak ah vui ka si ve I a thawhthannak ah ka tho than ve ti langhternak a siloah tehtekhannak le Khrihfabu member tling cohlannak caah a si.

Thlarau Baptisma kan ti mi hi Khrihfabu cheukhat nih cun, hrinthan kan si ni le can ah siloin can dang te ah kan co I cucu a riantuantu hna sinah thawnnak le ralthatnak a rian an ttuan khawhnak hnga caah pekmi a si tiah an ti. Thlarau Baptisma hmelchunnak cu holh theih lo hi a si I hrinthan a simi paohpaoh nih cun an holh lan lo zongah chikhat cu holhtheihlo in a hloh ta hrimhrim lai tiah an cawnpiak.

Bible kan zoh tikah cucu si dawh a si lo (1cor.12:13; Rom.6:3-) nih a kan cawnpiakmi cu thlarau Baptisma cu mi pakhatkhat nih Jesuh kha a zumh le a khamhtu ah a cohlan le cangka in thlarau thiang nih Jesuh chungah a khumhmi kha Thlarau Baptisma cu a si e a ti. Cucaah Thlarau Baptisma kan ti tikah hin lau le khuaruahhar in zeibantuk dah a si hnga tiah phundang tuk in co le hmuhton naa timh ahcun na zumhnak a pial sual ko lai, Jesuh na zumh ni kha thlarau Baptisma na co ni a si ti kha cathiang nih a kan cawnpiakmi a si.